- ఈరోజైనా ఫైనల్ అయితదా!
- ఒకేరోజు కాంగ్రెస్ స్క్రీనింగ్, సెంట్రల్ ఎలక్షన్ కమిటీల భేటీ
- అన్నీ కుదిరితే ఎల్లుండి లిస్టు ప్రకటించే అవకాశం ఉందంటున్న నేతలు
హైదరాబాద్, వెలుగు : కాంగ్రెస్ అభ్యర్థుల లిస్ట్ ప్రకటనపై పార్టీ వర్గాలతో పాటు రాజకీయ వర్గాలు ఆసక్తిగా ఎదురు చూస్తున్నాయి. దాదాపు రెండు నెలల నుంచి అభ్యర్థుల ఎంపికపై కసరత్తు చేస్తున్న పార్టీ నేతలు.. ఇప్పటికీ తేల్చలేకపోయారు. వివిధ వర్గాల నుంచి డిమాండ్లు ఊపందుకోవడం, ఆందోళనల దాకా వెళ్లడంతో స్క్రీనింగ్ కమిటీ మీటింగులు నిర్వహిస్తున్నా.. నేతలు ఓ అభిప్రాయానికి రాలేకపోతున్నారు. ఈ నేపథ్యంలోనే శుక్రవారం చివరిసారిగా ఢిల్లీలో స్క్రీనింగ్ కమిటీ సమావేశం కానుంది.
దాదాపు అన్ని నియోజకవర్గాల్లోని అభ్యర్థులపై ఓ అంచనాకు వచ్చారని తెలుస్తున్నది. అయినా, తొలి విడతలో భాగంగా 70 మందితో అభ్యర్థులను ప్రకటిస్తారన్న చర్చ పార్టీ వర్గాల్లో సాగుతున్నది. శుక్రవారం జరిగే స్క్రీనింగ్ కమిటీ మీటింగ్లో జాబితాపై చర్చించి సెంట్రల్ ఎలక్షన్ కమిటీకి లిస్టును అందించనున్నారు. ఆ లిస్టును పరిశీలించేందుకు శుక్రవారం సాయంత్రమే సెంట్రల్ఎలక్షన్ కమిటీ మీటింగ్ను నిర్వహిస్తున్నట్టు పార్టీ వర్గాల ద్వారా తెలుస్తున్నది. ఆయా మీటింగ్ల కోసం పీసీసీ చీఫ్ రేవంత్ రెడ్డి సహా కమిటీలోని ఇతర సభ్యులు ఇప్పటికే ఢిల్లీకి చేరుకున్నారు. అన్నీ ఓకే అయితే.. 15వ తేదీ లేదా ఆ తర్వాత లిస్ట్ ప్రకటించే చాన్స్ ఉందని అంటున్నారు.
ALSO READ : బీజేపీ నుంచి బరిలో సీనియర్లు..అక్టోబర్ 16 తర్వాత ఫస్ట్ లిస్ట్
జానారెడ్డితో భేటీ..
స్క్రీనింగ్ కమిటీ, సెంట్రల్ ఎలక్షన్ కమిటీ మీటింగ్లు వరుసగా ఉండటంతో గురువారం బుజ్జ గింపుల కమిటీ సభ్యులైన జానా రెడ్డితో పీసీసీ చీఫ్ రేవంత్ రెడ్డి, మాణిక్ రార్ ఠాక్రే సమావేశమ య్యారు. జూబ్లీహిల్స్లోని జానారెడ్డి నివాసంలో జరిగిన ఈ సమావేశానికి కమిటీలోని సభ్యులైన దీపాదాస్ మున్షి, మీనాక్షి నటరాజన్ హాజరయ్యారు. 70 నియోజకవర్గాల్లో ఇప్పటికే ఓ క్లారిటీ రాగా.. మిగతా నియోజకవర్గాల్లో అసంతృప్తుల పరిస్థితేంటన్న దానిపై జానారెడ్డితో రేవంత్, ఇతర నేతలు చర్చించినట్టు తెలిసింది. లిస్ట్ ప్రకటించే సాధ్యాసాధ్యాలపైనా చర్చ జరిగినట్టు తెలిసింది.
