- డ్యూటీకి రావాలని పీసీఎస్ ఆఫీసర్లకు డెడ్లైన్
- లేదంటే సస్పెండ్ చేస్తామని సీఎం హెచ్చరిక
- సీఎం, అడిషనల్సీఎస్తో చర్చలు
- సామూహిక సెలవుల నిరసన విరమణ
చండీగఢ్: పంజాబ్ సివిల్ సర్వీసెస్ (పీసీఎస్) ఆఫీసర్లు తమ సామూహిక సెలవుల నిరసనను బుధవారం విరమించుకున్నారు. దీనికి ముందు వారంతా సీఎం భగవంత్మాన్తో పాటు అడిషనల్ చీఫ్ సెక్రటరీ వేణుప్రసాద్తో సమావేశం అయ్యారు. త్వరలోనే పీసీఎస్ ఆఫీసర్లు డ్యూటీకి అటెండ్ అవుతారని వేణు ప్రసాద్ ప్రకటించారు. పీసీఎస్ ఆఫీసర్స్ అసోసియేషన్ ప్రతినిధులతో సమావేశం అయ్యామని చెప్పారు. శాంతియుత వాతావరణంలో చర్చలు సఫలం అయ్యాయని తెలిపారు.అసోసియేషన్ ప్రెసిడెంట్ రజత్ ఒబెరాయ్ కూడా నిరసన విరమణపై హామీ ఇచ్చారని చెప్పారు. సివిల్ సర్వీసెస్ అధికారుల తీరుపై బుధవారం ఉదయం సీఎం భగవంత్ మాన్ తీవ్ర స్థాయిలో మండిపడ్డారు. మధ్యాహ్నం 2 గంటలకల్లా అందరూ డ్యూటీలకు హాజరుకావాలని అల్టిమేటం జారీ చేశారు. లేదంటే సస్పెండ్ చేస్తానని వార్నింగ్ ఇచ్చారు. దీంతో అసోసియేషన్ ప్రతినిధులు చర్చలు జరిపి.. నిరసన విరమించుకున్నారు.
అసలేం జరిగిందంటే..
లూథియానాలోని రీజినల్ ట్రాన్స్పోర్ట్ ఆఫీసర్ నరీందర్ సింగ్ ధాలివాల్‌‌ను శుక్రవారం స్టేట్‌ విజిలెన్స్‌ బ్యూరో అధికారులు అరెస్ట్ చేశారు. రూల్స్ బ్రేక్ చేసిన వాహనదారులపై ఫైన్లు వేయ కుండా వారి నుంచి లంచం తీసుకుంటున్నారనే ఆరోపణలతో నరీందర్సింగ్ను అదుపులోకి తీసుకున్నారు. సివిల్ సర్వీసెస్ అధికారిని అక్రమంగా అరెస్టు చేశారని ఆరోపిస్తూ పీసీఎస్ అధికారులంతా సోమవారం నుంచి ఐదు రోజుల పాటు సామూహిక సెలవులపై వెళ్లిపోయారు. దీంతో ఆఫీసుల్లో పనులు ఎక్కడికక్కడ నిలిచిపోయాయి. దీనిపై సీఎం భగవంత్మాన్ తీవ్రంగా స్పందించారు. రెండు రోజులు చూసిన ఆయన, బుధవారం అల్టిమేటం జారీ చేశారు. ‘‘కొందరు పీసీఎస్ ఆఫీసర్లు సమ్మె పేరుతో డ్యూటీకి రావడం లేదని నా దృష్టికి వచ్చింది. అవినీతిపరుడైన అధికారికి సపోర్ట్ చేస్తూ నిరసన చేస్తున్నారు. ఇది బ్లాక్మెయిలింగ్ అవుతుంది. క్లియర్గా చెప్పాలంటే.. ఎవరు అవినీతికి పాల్పడినా సహించం. సెలవుల నిరసనను ఇల్లీగల్గానే పరిగణిస్తున్నాం. బుధవారం మధ్యాహ్నం 2 గంటలకల్లా అందరూ డ్యూటీకి రావాలి. రానివాళ్లందరినీ సస్పెండ్ చేస్తాం”అని భగవంత్ మాన్ హెచ్చరించారు. ఈ మేరకు అడిషనల్ సీఎస్కు లెటర్ కూడా రాశారు. చివరికి సీఎం కార్యదర్శితో అధికారులు చర్చలు జరిపి సమ్మెను విరమించుకున్నారు.
