సదాశివపేట, వెలుగు: సంగారెడ్డి జిల్లా సదాశివపేట పట్టణంలోని ప్రభు మందిరం దగ్గర ఉన్న హనుమాన్ ఆలయంలో ఈ నెల 15న వినాయక విగ్రహం ధ్వంసం చేసినందుకు నిరసనగా శనివారం హిందూ సంఘాలు బందుకు పిలుపునిచ్చాయి. పట్టణంలో వీహెచ్పీ, బీజేపీ, హిందు సంఘాల నాయకులు, యువకులు నిరసన ర్యాలీ చేపట్టారు. మత విద్వేశాలు రెచ్చగొట్టే వారిపై కఠిన చర్యలు తీసుకోవాలని డిమాండ్ చేశారు.
ఈ సందర్భంగా డీఎస్పీ సత్తయ్య మాట్లాడుతూ.. ఈ కేసుకు సంబంధించి దర్యాప్తులో సీసీ కెమెరాల పరిశీలించగా మందిరం దగ్గర ఆవులు కనిపించాయన్నారు. వాటిని ట్రాక్ చేయగా పట్టణంలోని కబ్రస్తాన్దగ్గర ఓ పశువు ముఖానికి ఇరువైపులా చందనం ఉన్నట్లు తేలిందన్నారు. గర్భగుడిలో ఉన్న పండ్లు, పూలు తినడానికి వెళ్లి ఉండవచ్చని భావిస్తున్నట్లు తెలిపారు.
ఆలయాలపై దాడులు నిరోధించాలి
సంగారెడ్డి టౌన్: హిందూ ఆలయాలలో విగ్రహాలను ధ్వంసం చేయడాన్ని నిరసిస్తూ విశ్వహిందూ పరిషత్ ఆధ్వర్యంలో కలెక్టరేట్ ఎదుట ఆందోళన నిర్వహించారు. ఈ సందర్భంగా బజరంగ్దళ్రాష్ట్ర నాయకుడు సుభాష్ చందర్ మాట్లాడుతూ.. హిందూ దేవాలయాలపై జరిగిన దాడులపై సిట్ బృందాన్ని ఏర్పాటు చేయాలని, విచారణ చేసి చట్ట ప్రకారం శిక్షించాలని, ఆలయాల వద్ద పోలీసు పికెటింగ్ఏర్పాటు చేయాలని డిమాండ్ చేశారు. కార్యక్రమంలో వీహెచ్పీ, బీజేపీ నాయకులు ప్రభు కుమార్ గౌడ్, మనోజ్, మాణిక్యరావు, నాగరాజ్, రవి, మహిళలు పాల్గొన్నారు.
