- దాదాపు 5,485 పోస్టులు నష్టపోతున్న నిరుద్యోగులు!
హైదరాబాద్, వెలుగు : గ్రూప్4 ఖాళీల్లో ప్రభుత్వం కోత పెట్టింది. రాష్ట్రవ్యాప్తంగా గ్రూప్ 4 స్థాయి ఖాళీలు ఎక్కువగా ఉన్నా.. తక్కువ సంఖ్యలో చూపించి, భర్తీకి అనుమతులు ఇచ్చింది. ఖాళీల లెక్కలు చూపకుండా మిగిల్చిన పోస్టులను ఇప్పుడు వీఆర్వోలతో సర్దుబాటు చేసేందుకు ప్లాన్ చేసింది. 15 వేలకుపైగా గ్రూప్ 4 ఖాళీలు ఉంటే, వాటిలో 9,168 పోస్టుల భర్తీకే క్లియరెన్స్ ఇచ్చింది. అంటే ఆరు వేల పైచిలుకు పోస్టులను తగ్గించింది. తాజాగా వీఆర్వోలను వివిధ డిపార్ట్మెంట్లలో సర్దుబాటు చేసేందుకు జూనియర్ అసిస్టెంట్ఖాళీలు ఎన్ని ఉన్నాయో పంపాలని కలెక్టర్లను ప్రభుత్వం ఆదేశించింది. ఈ మేరకు జిల్లాల నుంచి జీఏడీ, ఫైనాన్స్ డిపార్ట్మెంట్లకు వివరాలు అందుతున్నాయి. దీంతో మిగులు ఉద్యోగులుగా చూపెడుతున్న వీఆర్వోలను 5,485 జూనియర్ అసిస్టెంట్ పోస్టుల్లో భర్తీ చేయనున్నట్లు తెలిసింది. మరోవైపు వీఆర్వో పోస్టుల రద్దుతో దాదాపు 7,300 క్యాడర్ స్ర్టెంత్ ప్రభుత్వ ఉద్యోగాల్లో తగ్గింది. ఫలితంగా నిరుద్యోగులు రెండు రకాలుగా నష్టపోనున్నారు.
అప్పుడు రాని ఖాళీలు ఇప్పుడెలా?
మార్చిలో బడ్జెట్ సమావేశాల సందర్భంగా సీఎం కేసీఆర్ ఖాళీల వివరాలను ప్రకటించారు. అప్పుడు గ్రూప్ 4 కేటగిరీలో 9,168 ఖాళీలు ఉన్నాయని ఆయన వెల్లడించారు. ఇటీవల అంతే సంఖ్యలో పోస్టులకు ఆర్థిక శాఖ అనుమతులు ఇచ్చింది. దీంతో ఖాళీలు తక్కువే ఉన్నాయని అంతా భావించారు. తీరా ఇప్పుడు వీఆర్వో సర్దుబాటును ఏయే డిపార్ట్మెంట్లలో ఎన్ని ఖాళీల్లో భర్తీ చేసే అవకాశం ఉందో కలెక్టర్లు రిపోర్టులు పంపుతున్నారు. దీంతో అప్పుడు ఖాళీలను తక్కువ చేసి చూపినట్లు చర్చ జరుగుతోంది. గ్రూప్ 4 ఖాళీలు పెరిగే చాన్స్ ఉందని గతంలో సీఎస్ కూడా ఒక రివ్యూలో అన్నారు. అయితే వాటిని వీఆర్వోల కోసం రిజర్వ్ చేయడంతో నిరుద్యోగులకు ఆ పోస్టులు దక్కకుండా పోతున్నాయి. దాదాపు 5,485 పోస్టులను నిరుద్యోగులు కోల్పోతున్నారు. ప్రభుత్వం కొత్త పోస్టులు మంజూరు చేసి ఉంటే నిరుద్యోగులకు ఎలాంటి నష్టం వచ్చేది కాదని ఆఫీసర్లు అంటున్నారు.
