న్యూఢిల్లీ: అంతర్జాతీయ మార్కెట్లో క్రూడాయిల్ బ్యారెల్ ఏకంగా 100 డాలర్లు దాటడంతో కేంద్ర ప్రభుత్వం అలెర్టయింది. ఉక్రెయిన్పై యుద్ధం చేస్తున్న రష్యా భారీగా చమురును ఎగుమతి చేసే దేశాల్లో ఒకటి. దీనిపై మరిన్ని ఆంక్షలు విధిస్తే ఆయిల్ రేట్లు ఇంకా పెరిగే ప్రమాదం ఉంది. ప్రస్తుత ధరలు ఏడేళ్ల హైకి చేరుకున్నాయి. దీంతో చమురు ధరలపై చర్చించడానికి ప్రైమ్ మినిస్టర్ నరేంద్ర మోడీ గురువారం సమావేశమవుతానని ఫైనాన్స్ మినిస్టర్ నిర్మలా సీతారామన్ తెలిపారు. యుద్ధం, చమురు ధరల పెరుగుదల వల్ల ఏర్పడే సమస్యలపై వీరిద్దరూ మాట్లాడుకుంటారని తెలుస్తోంది. ధరలను అదుపు చేయడానికి పెట్రో ప్రొడక్టులపై విధిస్తున్న ఎక్సైజ్ డ్యూటీ ఏ మేరకు తగ్గించవచ్చో పరిశీలించాలని పీఎం ఆఫీసు ఫైనాన్స్ మినిస్ట్రీకి సూచించినట్టు తెలుస్తోంది. దీంతో ఫైనాన్స్ మినిస్ట్రీ పన్నుల తగ్గింపుపై కసరత్తు మొదలుపెట్టిందని ఈ సంగతి తెలిసిన వాళ్లు చెప్పారు. చమురు ధరల పెరుగుదల మనకు కచ్చితంగా సవాలేనని మంత్రి నిర్మల బుధవారమే మీడియాతో అన్నారు. కేంద్ర ప్రభుత్వం చివరిసారిగా గత ఏడాది నవంబరులో డీజిల్పై రూ.10, పెట్రోలుపై రూ.ఐదు చొప్పున ఎక్సైజ్ డ్యూటీ తగ్గించింది. ఈ తరువాత నుంచి ధరల్లో ఎటువంటి మార్పులూ కనిపించడం లేదు. అప్పటికే ధరలు ఎక్కువ కావడంతో ఎక్సైజ్ డ్యూటీలో కోత పెట్టారు. ఈ నిర్ణయం తరువాత కూడా చమురు ధరలు మరింత పెరిగి ఇప్పుడు తారస్థాయికి చేరాయి. దీంతో కేంద్ర ప్రభుత్వానికి చెందిన ఆయిల్ మార్కెటింగ్ కంపెనీలకు భారీగా నష్టాలు వస్తున్నాయి. అయితే యుద్ధం మరింత పెరిగినప్పటికీ, ఇండియాకు చమురు సప్లైకి మాత్రం ఎలాంటి ఇబ్బందీ ఉండబోదని ఆయిల్ మినిస్ట్రీకి చెందిన సీనియర్ ఆఫీసర్ ఒకరు చెప్పారు. యుద్ధం కారణంగా సప్లై లైన్లు ఏవీ దెబ్బతినలేదని, మార్కెట్లో తగినంత సప్లై ఉందని చెప్పారు. మనకు మిడిల్ ఈస్ట్, ఆఫ్రికా, నార్త్ అమెరికా నుంచి క్రూడాయిల్ వస్తుందని, ఆ ప్రాంతాలన్నీ సేఫ్గానే ఉన్నాయని ఆయన వివరించారు.
