న్యూఢిల్లీ: లాక్డౌన్ కారణంగా సొంతూళ్లకు చేరుకున్న వలస కూలీలకు ఉపాధి కల్పించేందుకు ప్రధాని నరేంద్ర మోడీ శనివారం కొత్త పథకాన్ని ప్రారంభించారు. బీహార్లోని కతిహార్ జిల్లాలో ఓ గ్రామం నుంచి ప్రధాని వీడియో కాన్ఫరెన్స్ ద్వారా ఈ స్కీమ్ను ప్రారంభించారు. బీహార్, మధ్యప్రదేశ్, ఉత్తరప్రదేశ్, రాజస్థాన్, జార్ఖండ్, ఒడిశా రాష్ట్రాల సీఎంలు కూడా ఈ కాన్ఫరెన్స్ కు హాజరయ్యారు. గరీబ్ కల్యాణ్ రోజ్గార్ అభియాన్ పేరుతో లాంచ్ చేసిన ఈ పథకం కింద 116 జిల్లాల్లో వలస కూలీలకు పనులు చూపెట్టనున్నారు. 125 రోజుల పాటు ఉండే ఈ పనులతో వలస కూలీలకు ఉపాధి దొరుకుతుందని పీఎంవో వర్గాలు చెప్పాయి. మైగ్రెంట్ వర్కర్స్ తో పాటు వివిధ టెక్నాలజీ నిపుణులు కూడా గ్రామాలకు చేరుకున్నారని, దీంతో గ్రామాల్లో ఇంటర్ నెట్వాడకం పెరిగిందని తెలిపాయి. దీంతో నెట్ స్పీడ్ పెంచాల్సిన అవసరం ఉందని, ఆ దిశగా ప్రయత్నాలు జరుగుతున్నాయని వివరించాయి. సిటీల అభివృద్ధికి కారణమైన చేతులే ఇప్పుడు గ్రామాలకు చేరాయని, దీంతో గ్రామాలు అభివృద్ధి చెందుతాయని ప్రధాని మోడీ ఆశాభావం వ్యక్తంచేశారు. ఇప్పుడు ప్రవేశ పెట్టిన కొత్త స్కీమ్ కూడా వారికి తోడ్పడుతుందని చెప్పారు. కరోనా మహమ్మారిని ఎదుర్కోవడానికి గ్రామీణ ప్రాంతాల్లో జనం తీసుకుంటున్న ముందు జాగ్రత్తలను ఆయన మెచ్చుకున్నారు. ఈ స్కీమ్ను ప్రారంభించడానికి ముందు కొంతమంది వలస కార్మికులతో వీడియో కాన్ఫరెన్స్ ద్వారా మాట్లాడారు. లాక్డౌన్ టైంలో ప్రభుత్వం తీసుకొచ్చిన పలు సంక్షేమ పథకాలు ఉపయోగపడ్డాయా ? అని ప్రధాని వారిని అడిగి తెలుసుకున్నారు. అంతకుముందు, లడక్లో చైనా సైనికులతో పోరాడుతూ వీరమరణం పొందిన బీహార్ రెజిమెంట్సైనికులకు ఆయన నివాళులర్పించారు. వారి త్యాగాన్ని దేశం ఎన్నటికీ మరువదన్నారు.
రూరల్ ఎంప్లాయ్మెంట్ స్కీమ్కు భిన్నం
ఇప్పటికే అమలులో ఉన్న గ్రామీణ ఉపాధి హామీ పథకంతో పోలిస్తే గరీబ్ కల్యాన్ రోజ్గార్ అభియాన్ పథకం భిన్నమైందని అధికార వర్గాలు తెలిపాయి. ఉపాధి హామీ(ఎంజీఎన్ఆర్ఈజీఎస్) స్కీమ్ కింద ఏడాదిలో 100 రోజుల పని కల్పిస్తారు. దేశం మొత్తానికీ వర్తించే పథకమిది. ఈ స్కీమ్ కింద పెద్ద సంఖ్యలో పనులు చేపట్టవచ్చు. బలహీన వర్గాలకు చెందిన రైతుల వ్యవసాయ భూముల్లో పనులను కూడా ఈ పథకం కింద చేయించవచ్చు. చేసిన పనికి ప్రభుత్వమే డబ్బు చెల్లిస్తుంది. లాక్ డౌన్ కారణంగా సొంతూళ్లకు వచ్చిన వలస కార్మికులకు ఉపాధి కల్పించేందుకు చేపట్టిన పథకం గరీబ్ కల్యాన్ రోజ్గార్ అభియాన్.. ఇది వన్ టైం ఎంప్లాయ్మెంట్ స్కీమ్ మాత్రమే. దేశంలోని ఎంపిక చేసిన 116 జిల్లాల్లో వలస కూలీలకు 125 రోజుల పాటు ఉపాధి కల్పించేందుకు ఉద్ధేశించిన స్కీమ్ ఇది.
12 శాఖలు ఒక్కటై..
ప్రభుత్వంలోని 12 శాఖలు కలిసికట్టుగా అమలు చేయాల్సిన పథకమిది. రూరల్ డెవలప్మెంట్ శాఖ, పంచాయతీరాజ్, రోడ్ ట్రాన్స్పోర్ట్ అండ్ హైవేస్, మైన్స్, డ్రింకింగ్ వాటర్ అండ్ శానిటేషన్, ఎన్విరాన్మెంట్, రైల్వే, పెట్రోలియం అండ్ నేచురల్ గ్యాస్, న్యూ అండ్ రెన్యూవబుల్ ఎనర్జీ, బార్డర్ రోడ్స్, టెలీకాం, వ్యవసాయ శాఖ.
25 రకాల పనులు
పేదవారికి ఇళ్లు కట్టివ్వడం, మొక్కలు నాటడం, జల్జీవన్ మిషన్ కింద తాగునీటి సరఫరా, పంచాయతీ భవనాల నిర్మాణం, కమ్యూనిటీ టాయిలెట్స్ నిర్మాణం, గ్రామీణ మండీలు, గ్రామీణ రోడ్లు, అంగన్ వాడీ భవ నాల నిర్మాణం తదితర 25 రకాల పనులతో కూలీలకు సొంతూళ్లోనే 125 రోజులు ఉపాధి కల్పిస్తారు.
