నిజామాబాద్ క్రైమ్, వెలుగు: డీసీపీ జయరాం, ఆర్ఐ వెంకటప్ప నాయుడు జర్నలిస్టులను పక్కకు నెట్టేయడంతో జర్నలిస్టులకు, పోలీసులకు మధ్య తోపులాట జరిగింది. ఈ విషయమై జర్నలిస్టులు కమిషనర్ కల్మేశ్వర్ కు ఫిర్యాదు చేశారు. ఆర్మూర్ ఎమ్మెల్యే పైడి రాకేశ్రెడ్డి తనకు ప్రాణహాని ఉందని మంగళవారం సీపీ కల్మేశ్వర్ కు కలవడానికి వచ్చారు. సీపీతో మాట్లాడి బయటకు వస్తున్న పైడి సీపీతో మాట్లాడిన విషయాన్ని జర్నలిస్ట్లకు వివరిస్తున్నారు. అదే సమయంలో అడిషనల్ సీపీ గిరిరాజ్, ఆర్ఐ వెంకటప్ప నాయుడు జర్నలిస్టులను తోసేయడంతో ఘర్షణ వాతావరణం నెలకొంది.
ఆర్మూర్ ఎమ్మెల్యే పైడి రాకేశ్రెడ్డి అక్కడే బైటాయించి పోలీసుల జులూం నశించాలంటూ నినాదాలు చేశారు. మీడియా ప్రతినిధులపై దురుసుగా ప్రవర్తించిన పోలీసులపై చర్యలు తీసుకోవాలని డిమాండ్ చేశారు. అనంతరం సీపీ జర్నలిస్టులను తన ఛాంబర్ కు పిలిపించుకొని మాట్లాడారు. ఆర్మూర్ ఎమ్మెల్యే పైడి రాకేశ్రెడ్డి తనకు బెదిరింపు కాల్స్ వస్తున్నాయని, ప్రాణ హాని ఉందని ఫిర్యాదు చేశారని, ఆ సమయంలో ఎమ్మెల్యే అనుచరులు అరుపులు, నినాదాలు చేయడంతో వారిని కంట్రోల్ చేసేందుకే పోలీసులు అలా ప్రవర్తించారే తప్ప, మరో ఉద్దేశం లేదన్నారు. ఇలాంటి ఘటనలు రిపీట్కాకుండా చూస్తానన్నారు.
