మేడిపల్లి/మెహిదీపట్నం/ఇబ్రహీంపట్నం/వికారాబాద్ వెలుగు : ఎన్నికల కోడ్ నేపథ్యంలో సిటీలోని పలు ప్రాంతాల్లో పోలీసులు చెక్ పోస్టులు ఏర్పాటు చేసి వెహికల్ చెకింగ్ చేస్తున్నారు. మంగళవారం వివిధ ప్రాంతాల్లో చేపట్టిన తనిఖీల్లో భారీగా డబ్బును స్వాధీనం చేసుకున్నారు.
- చెంగిచర్లలోని ఐవోసీ బస్టాప్ వద్ద మేడిపల్లి, మల్కాజిగిరి ఎస్వోటీ పోలీసులు తనిఖీలు చేపట్టారు. ఈస్ట్ మారేడ్ పల్లికి చెందిన మహ్మద్ ఉమర్(50) అనే వ్యక్తి కారును అడ్డుకుని చెక్ చేశారు. రూ.6 లక్షలను గుర్తించారు. ఆ డబ్బుకు సంబంధించి ఉమర్ ఎలాంటి ఆధారాలు చూపకపోవడంతో వాటిని సీజ్ చేశారు. క్యాష్ తో పాటు కారు, సెల్ఫోన్ను స్వాధీనం చేసుకున్నారు. రూ. 50 వేలకు మించి డబ్బు తీసుకెళ్తున్నట్లయితే సరైన ఆధారాలు చూపించాలని లేకపోతే వాటిని సీజ్ చేసి కోర్టుకు అప్పగిస్తామని సీఐ సైదులు తెలిపారు.
- ఆసిఫ్నగర్ పీఎస్ పరిధిలోని మిరాజ్ చౌరస్తా వద్ద ఓ వెహికల్ను తనిఖీ చేసిన పోలీసులు రూ.6 లక్షలను స్వాధీనం చేసుకున్నారు.
- రంగారెడ్డి జిల్లా ఇబ్రహీంపట్నంలో భారత్ గార్డెన్స్ వద్ద మంచాల గ్రామానికి వెళ్లే దారిలో పోలీసులు వెహికల్ చెకింగ్ చేపట్టారు. ఓ ఆటోను ఆపి తనిఖీ చేయగా.. రూ.6 లక్షల 55 వేల డబ్బు పట్టుబడింది. ఆ డబ్బును తీసుకెళ్తున్న ఆరుట్ల గ్రామానికి చెందిన కాసుల సురేశ్ను పోలీసులు అదుపులోకి తీసుకున్నారు. ఎలాంటి పత్రాలు లేకపోవడంతో డబ్బును ఎన్నికల అధికారికి అప్పగించినట్లు పోలీసులు తెలిపారు.
- ఆసిఫ్నగర్ ప్రాంతానికి చెందిన మహ్మద్ మోహిత్ కారులో తాండూరు వైపు వెళ్తున్నాడు. వికారాబాద్లో అతడి కారును తనిఖీ చేసిన పోలీసులు రూ.9 లక్షల 50 వేలను స్వాధీనం చేసుకున్నారు. ఆ మొత్తాన్ని సీజ్ చేసి ఐటీ అధికారులకు అప్పగించారు.
