ఖమ్మం కాంగ్రెస్లో.. పొంగులేటి పాలిటిక్స్

ఖమ్మం కాంగ్రెస్లో.. ‘పొంగులేటి’ పాలిటిక్స్
అశ్వారావుపేట, సత్తుపల్లి టూర్లలో బయటపడ్డ విభేదాలు
కలుపుకొని పోవడం లేదని కాంగ్రెస్ నేతల ఆవేదన
సోషల్ మీడియాలో దయానంద్ అనుచరుల పోస్టులు
గ్రూపు రాజకీయాలను ప్రోత్సహిస్తున్నాడని ‘తాటి’ ఫైర్
ఇదే అదనుగా వర్గపోరుపై అధికార పార్టీ నేతల సెటైర్లు

ఖమ్మం, వెలుగు: ఉమ్మడి ఖమ్మం జిల్లాలో మాజీ ఎంపీ పొంగులేటి శ్రీనివాస్ రెడ్డి పర్యటనలు కాంగ్రెస్ పార్టీలో కాక రేపుతున్నాయి. నియోజకవర్గాల పర్యటన సందర్భంగా తన వర్గం నేతలను వెంటేసుకొని తిరుగుతున్న ఆయన, మిగిలిన వర్గాలను పక్కనపెట్టడంపై విమర్శలు వస్తున్నాయి. రాష్ట్ర కాంగ్రెస్ ప్రచార కమిటీ కో చైర్మన్ గా ఉన్న పొంగులేటి ఖమ్మంలో గ్రూపు పాలిటిక్స్ ప్రోత్సహించడం ఏమిటంటూ కాంగ్రెస్ నేతలు ఎటాక్ చేస్తున్నారు. భద్రాద్రి కొత్తగూడెం జిల్లా అశ్వారావుపేట పర్యటనపై మాజీ ఎమ్మెల్యే తాటి వెంకటేశ్వర్లు మీడియా ముందే విమర్శలు చేయగా, సత్తుపల్లి పర్యటన మీద మట్టా దయానంద్ వర్గీయులు..తమకు కనీస సమాచారమివ్వకపోవడాన్ని ప్రశ్నిస్తూ సోషల్ మీడియా గ్రూపుల్లో బహిరంగ లేఖ పేరుతో పోస్టులు పెడుతున్నారు. మరోవైపు ఇదే అదనుగా అధికార పార్టీ నేతలు విమర్శలు గుప్పిస్తున్నారు. కాంగ్రెస్లో పొంగులేటి మార్క్ పాలిటిక్స్ మొదలయ్యాయంటూ సెటైర్లు వేస్తున్నారు.

కావాలనే దూరం పెడ్తున్నరా?

బీఆర్ఎస్ నుంచి బయటకు వచ్చిన పొంగులేటి, ఈనెల 2న ఖమ్మంలో రాహుల్ గాంధీ సమక్షంలో కాంగ్రెస్ పార్టీలో చేరారు. ఈ సందర్భంగా పార్టీలో గ్రూపు రాజకీయాలకు, వర్గ విభేదాలకు అవకాశం ఇవ్వకుండా అందరినీ కలుపుకొని పోతానని చెప్పిన ఆయన, ఆచరణలో మాత్రం పాటించడం లేదని ఆ పార్టీలోని కొందరు లీడర్లు విమర్శిస్తున్నారు. ఇటీవల రాష్ట్ర కాంగ్రెస్ ప్రచార కమిటీ కో చైర్మన్ గా పొంగులేటి నియమితులయ్యారు. రీసెంట్ గా అశ్వారావుపేట, సత్తుపల్లి నియోజకవర్గాల్లో పర్యటించారు. అశ్వారావుపేట టూర్ కు మాజీ ఎమ్మెల్యే తాటి వెంకటేశ్వర్లు, ములకలపల్లి జడ్పీటీసీ సున్నం నాగమణి వర్గం దూరంగా ఉన్నారు. తమను పిలవకుండానే కార్యక్రమాన్ని ఏర్పాటు చేశారని ఈ ఇద్దరు నేతలు ఆరోపిస్తున్నారు.

మాజీ ఎమ్మెల్యే తాటి మాత్రం తాను పీసీసీకి కంప్లయింట్ చేస్తానని చెప్పారు. అదే రోజు సాయంత్రం సత్తుపల్లి టూర్ కు మట్టా దయానంద్ వర్గం దూరంగా ఉన్నారు. సత్తుపల్లి నుంచి నలుగురు కాంగ్రెస్ టికెట్ ఆశిస్తుండగా, అందులో ముగ్గురిని కార్యక్రమానికి పిలిచి, ఒక్కరిని పక్కనపెట్టడం ఏమిటని దయానంద్ అనుచరులు ప్రశ్నిస్తున్నారు. అయితే ప్రస్తుతం పొంగులేటిపై విమర్శలు చేస్తున్న తాటి వెంకటేశ్వర్లు, మట్టా దయానంద్ ఇద్దరూ గతంలో ఆయన అనుచరులే కావడం గమనార్హం.

నాలుగు మెట్లు దిగుతానని..

పొంగులేటి 2014లో వైసీపీ తరపున ఖమ్మం ఎంపీగా గెలిచిన సమయంలో వైసీపీ తరపున అశ్వారావుపేట నుంచి తాటి ఎమ్మెల్యేగా విజయం సాధించారు. ఆ తర్వాత పొంగులేటి వెంట టీఆర్ఎస్లో చేరారు. 2018 ఎన్నికల్లో ఆ పార్టీ తరపున పోటీచేసి ఓడిపోయారు. అక్కడ టీడీపీ తరపున గెలిచిన మెచ్చా నాగేశ్వరరావు ఆ తర్వాత బీఆర్ఎస్ లో చేరగా, తనకు పార్టీలో ప్రాధాన్యత లేదంటూ గతేడాది తాటి వెంకటేశ్వర్లు కాంగ్రెస్లో చేరారు. బీఆర్ఎస్లో ఉన్నప్పటి నుంచే పొంగులేటిని విభేదించి ఆయనకు దూరంగా ఉన్నారు. దీంతో తన వర్గం అభ్యర్థిగా జారే ఆదినారాయణను పొంగులేటి ప్రకటించారు. ఆ తర్వాత పరిణామాల్లో ఆయన కూడా కాంగ్రెస్ లో చేరారు. అయినా గత విభేదాల దృష్ట్యా తాటిని పొంగులేటి దూరం పెడ్తున్నారన్న అభిప్రాయాలు వ్యక్తమవుతున్నాయి.

ఇక సత్తుపల్లి లీడర్ డాక్టర్ మట్టా దయానంద్ పరిస్థితి కూడా దాదాపు ఇలాగే ఉంది. 2014లో సత్తుపల్లిలో వైసీపీ తరపున పోటీ చేసి, కొద్ది ఓట్ల తేడాతో సండ్రపై ఓడిపోయారు. తర్వాత పొంగులేటి వెంట అప్పటి టీఆర్ఎస్ చేరారు. 2018లో టీఆర్ఎస్ తరపున టికెట్ ఆశించినా దక్కలేదు. కొద్ది నెలల క్రితం పొంగులేటితో విభేదించి, ఆయన కంటే ముందుగానే దయానంద్ కాంగ్రెస్ లో చేరారు. సత్తుపల్లి పర్యటనకు రెండ్రోజుల ముందు కూడా పొంగులేటిని దయానంద్ కలిసి సన్మానించారని, అయినా కావాలనే పొంగులేటి దూరం పెట్టారని ఆయన అనుచరులు చెబుతున్నారు. దీనిపై 8 ప్రశ్నలతో సోషల్ మీడియాతో పోస్టింగులు పెట్టారు. అందరినీ కలుపుకొని పోయేందుకు నాలుగు మెట్లయినా దిగుతాను అని చెప్పి, ఇప్పుడెందుకు ఇలా అంటూ బహిరంగ లేఖను విడుదల చేశారు.

రేణుక అనుచరులకూ సమాచారం ఉంటలే..

ప్రచార కమిటీ కో చైర్మన్ గా బాధ్యతలు తీసుకున్న తర్వాత పొంగులేటి ముందుగా వైరాలో భారీ బైక్ ర్యాలీ నిర్వహించారు. ఈ సందర్భంగా రేణుకాచౌదరి అనుచరుడిగా వైరా ఎమ్మెల్యే టికెట్ ఆశిస్తున్న ధరావత్ రామ్మూర్తి నాయక్ కు ఆహ్వానం అందలేదని కాంగ్రెస్ కార్యకర్తలు చెబుతున్నారు. మరోవైపు ఇదే అదనుగా కాంగ్రెస్లోని వర్గ విభేదాలపై బీఆర్ఎస్ నేతలు పొంగులేటిని కౌంటర్ చేస్తున్నారు. సత్తుపల్లిలో నాలుగు కాంగ్రెస్ క్యాంప్ ఆఫీసులను తీసేసి, ఒక్కటే పెట్టి నడిపించగల సత్తా ఉందా..? అంటూ ఎమ్మెల్యే సండ్ర వెంకటవీరయ్య ప్రశ్నించారు. సత్తుపల్లిలో కేసీఆర్ తనను ఎమ్మెల్యే అభ్యర్థిగా ప్రకటించారని, మీ అభ్యర్థి ఎవరో ప్రకటించే దమ్ముందా..? అని సవాల్ చేశారు.