హైదరాబాద్, వెలుగు: నెహ్రూ జూపార్క్‌‌లో శుక్రవారం సందడి నెలకొంది. జూలోని అత్యంత చిన్నదైన ‘ప్రేమ’ అనే ఒంటికొమ్ము ఖడ్గమృగం పుట్టినరోజు వేడుకలను ఘనంగా నిర్వహించారు. ఈ కార్యక్రమానికి గుజరాత్లోని ప్రముఖ వంతారా జూ డైరెక్టర్ బ్రిజ్ కిశోర్ గుప్తా, ఆయన టీమ్ హాజరుకాగా.. జూ క్యూరేటర్ జె.వసంత, ఇతర సిబ్బంది ఆయనకు స్వాగతం పలికారు.
వన్యప్రాణుల సంరక్షణపై అవగాహన కల్పించడంలో భాగంగా నిర్వహించిన ఈ వేడుకలో.. పండ్లు, కూరగాయలతో ప్రత్యేకంగా తయారు చేసిన 5 కిలోల కేక్‌‌ను ‘ప్రేమ’కు అందించారు. ప్రస్తుతం నెహ్రూ జూలో సూరజ్, సరస్వతి, సాయి విజయ్, నంద, ప్రేమ అనే 5 ఒంటికొమ్ము ఖడ్గమృగాలు ఉన్నట్లు అధికారులు తెలిపారు.
అనంతరం, వంతారా జూ బృందం సఫారీ పార్క్ కాంప్లెక్స్‌‌తోపాటు అంతరించిపోతున్న పలు జంతువుల ఎన్‌‌క్లోజర్లను పరిశీలించింది. జూ నిర్వహణ, పరిశుభ్రత బాగుందని ప్రశంసించింది. ఇటీవల జూకు ఐఎస్‌‌వో సర్టిఫికెట్ రావడంపై మేనేజ్‌‌మెంట్‌‌ను, సిబ్బందిని అభినందించింది. కార్యక్రమంలో డిప్యూటీ క్యూరేటర్ ఎం.బర్నోబా, డిప్యూటీ డైరెక్టర్ (వెట్) ఎం.ఏ. హకీమ్, అసిస్టెంట్ డైరెక్టర్ పి.శ్రీనివాస్ రెడ్డి, ఏసీలు నాజియా తబస్సుమ్, లక్ష్మణ్, సీనియర్ బయాలజిస్ట్ లక్ష్మీనారాయణ తదితరులు పాల్గొన్నారు.
