- దోపిడీకి పాల్పడిందిథానే గ్యాంగ్!
- ముంబైకి చేరుకున్నపోలీసు బృందాలు
సికింద్రాబాద్, వెలుగు: సికింద్రాబాద్ మొండా మార్కెట్ పాన్ బజార్లోని బంగారు నగల మెల్టింగ్ షాప్లో జరిగిన చోరీ కేసులో పోలీసులు పురోగతి సాధించారు. ఈ చోరీకి పాల్పడింది మహారాష్ట్రలోని థానేకు చెందిన గ్యాంగ్ గా ముంబై పోలీసులు నిర్ధారించడంతో స్థానిక పోలీసు బృందాలు ముంబైకి బయళ్దేరి వెళ్లాయి. పోలీసుల వివరాల ప్రకారం.. ముంబై నుంచి ఎనిమిది మంది సభ్యుల ముఠా ఈ నెల 24న సిటీకి వచ్చి ప్యాట్నీ సెంటర్లోని ఢిల్లీ లాడ్జ్ లో బసచేశారు. పాన్బజార్లోని ఆ నగల మెల్టింగ్ షాపునకు వెళ్లి మూడ్రోజుల పాటు రెక్కీ నిర్వహించారు. షాప్లో యజమాని లేడని నిర్ధారించుకున్నారు.
దీంతో శనివారం ఆ గ్యాంగ్లోని ఆరుగురు సభ్యులు ఐటీ అధికారులమంటూ షాప్ లోపలికి ప్రవేశించారు. మిగతా ఇద్దరు షాపు ముందు కాపలా ఉన్నారు. సోదాల పేరు చెప్పి సరైన డాక్యుమెంట్లు లేవంటూ 1700 గ్రాముల బంగారు బిస్కెట్లు తీసుకొని బయటకువచ్చి అంతా కలిసి ఆటోలో కూకట్పల్లికి పారిపోయారు. అక్కడ నుంచి వారంతా బస్సులో ముంబైకి వెళ్లినట్లు పోలీసుల విచారణలో తేలింది. ఈ దోపిడీ విధానాన్ని స్థానిక పోలీసులు ముంబై పోలీసులకు వివరించగా.. ఇది థానే గ్యాంగ్ పనిగా వారు నిర్ధారించారు. దీంతో పోలీసు బృందాలు ముంబైకి వెళ్లి నిందితుల కోసం గాలింపు చేపట్టినట్లు సమాచారం.
