- రాష్ట్ర వ్యాప్తంగా అగ్ని ప్రమాదాల్లో 69 మంది మృతి: ఫైర్స్ డీజీ
హైదరాబాద్, వెలుగు: ‘గడిచిన ఏడాదిన్నర కాలంలో రాష్ట్ర వ్యాప్తంగా జరిగిన అగ్ని ప్రమాదాల్లో రూ.352 కోట్ల విలువ చేసే ఆస్తులు బుగ్గిపాలయ్యాయి. 69 మంది ప్రాణాలు కోల్పోయారు’ అని ఫైర్స్ డీజీ నాగిరెడ్డి తెలిపారు. 2022లో స్టేట్లో 7,368 ఫైర్యాక్సిడెంట్లు జరిగాయని, అందులో 104 తీవ్రత ఎక్కువ ఉన్నవి, 7,129 తీవ్రత తక్కువవి నమోదయ్యాయని చెప్పారు. ఈ ప్రమాదాల్లో సుమారు రూ.212 కోట్ల ఆస్తి నష్టం వాటిల్లిందని తెలిపారు. అలాగే, ఈ ఏడాది జూన్ చివరి నాటికి రాష్ట్ర వ్యాప్తంగా 5,617 అగ్నిప్రమాదాలు జరిగాయన్నారు. అందులో 87 ఎక్కువ తీవ్రతలో జరగగా, 5,452 చిన్నపాటి ప్రమాదాలు చోటుచేసుకున్నాయని తెలిపారు. ఈ ప్రమాదాల్లో రూ.140 కోట్ల ఆస్తి నష్టం వాటిల్లిందన్నారు.
