- మాజీ సర్పంచ్ భర్తపై చర్యలు తీసుకోవాలని దళిత సంఘాల డిమాండ్
దేవరకొండ(చింతపల్లి), వెలుగు: దళిత మహిళపై దాడిని నిరసిస్తూ ఆదివారం నల్గొండ జిల్లా చింతపల్లి క్రాస్రోడ్పై రాస్తారోకో చేపట్టారు. మండలంలోని పీకే మల్లేపల్లి గ్రామపంచాయతీలో వీవోఏగా పని చేస్తున్న గనిపల్లి మాధవిపై ఆర్థికపరమైన ఆరోపణలు రాగా, ఈ నెల 2న గ్రామసభలో ఆమె వివరణ ఇస్తుండగా గ్రామ మాజీ సర్పంచ్ భర్త కొప్పుల అమర్‌‌‌‌నాథ్ గౌడ్ కులం పేరుతో దూషించి ఆమెపై దాడికి పాల్పడ్డాడు. ఈ దాడిని నిరసిస్తూ ఆదివారం దళిత సంఘాల ఆధ్వర్యంలో చింతపల్లి క్రాస్‌‌‌‌రోడ్‌‌‌‌లో ఆందోళనకు దిగారు.
ఈ ఘటనపై పోలీసులు ఎస్సీ, ఎస్టీ అట్రాసిటీ చట్టం కింద కేసు నమోదు చేసి నిందితుడిపై కఠిన చర్యలు తీసుకోవాలని డిమాండ్ చేశారు. ఈ ఆందోళనతో నాగార్జునసాగర్–హైదరాబాద్ హైవేపై భారీగా ట్రాఫిక్ నిలిచిపోయింది. చింతపల్లి ఎస్సై రామ్మూర్తి అక్కడికి చేరుకొని నిందితుడిని త్వరలో పట్టుకొని కఠిన శిక్ష పడేలా చూస్తామని హామీ ఇవ్వడంతో ఆందోళన విరమించారు. ఎమ్మార్పీఎస్ జిల్లా ఇన్చార్జి కోళ్ల శివ, నాయకులు బకరం శ్రీనివాస్, వస్కుల శ్రీను పాల్గొన్నారు.
