- అమ్మమ్మ వాళ్లది అదే ఊరని ఫోన్లో చెప్పిన మేనత్త
- ఊర్లో అందరినీ అడుగుతూ అమ్మ దగ్గరికి చేరిన యువకుడు
పాటియాలా: వరద బాధితులకు సాయం చేసేందు కు వెళ్లిన ఓ వ్యక్తి.. 35 ఏండ్ల కింద దూరమైన తల్లిని చేరుకున్నాడు. రెస్క్యూ ఆపరేషన్లో వలంటీర్గా వెళ్లిన ఊరిలో మొదటిసారి తన తల్లిని చూడగలిగాడు. పంజాబ్లోని బోహర్పూర్ గ్రామంలో అనుకోకుండా కలిసిన తల్లీకొడుకుల స్టోరీ ఇది.
అత్త ఫోన్ కాల్ మలుపు తిప్పింది..
పంజాబ్కు చెందిన జగ్జీత్ సింగ్ తాను చంటిబిడ్డగా ఉన్నపుడే తండ్రి చనిపోయాడు. తల్లి రెండో పెండ్లి చేసుకుంది. రెండేండ్ల వయసున్నప్పుడు జగ్జీత్ను రిటైర్డ్ పోలీస్ ఆఫీసర్ అయిన తాత, నానమ్మ తమ దగ్గరికి తెచ్చుకుని పెంచారు. జగ్జీత్ పెరిగేకొద్దీ తల్లిదండ్రుల గురించి అడిగితే యాక్సిడెంట్లో చనిపోయారని చెప్పేవాళ్లు. ప్రస్తుతం 37 ఏండ్లున్న జగ్జీత్సింగ్ ఓ ఎన్జీవో నడుపుతూ, గురుద్వారాలో ఆధ్యాత్మిక గాయకుడిగా పనిచేస్తున్నాడు. ఇటీవలి వర్షాలు పాటియాలాను ముంచెత్తడంతో జగ్జీత్ తన ఎన్జీవో సభ్యులతో కలిసి రెస్క్యూ ఆపరేషన్కు వెళ్లాడు. అక్కడ సహాయ చర్యలు చేపడుతుండగా జగ్జీత్కు అతడి అత్త ఫోన్ చేశారు. అమ్మమ్మ కుటుంబం అక్కడే బోహర్పూర్లో ఉండేదని చెప్పడంతో జగ్జీత్ సెర్చింగ్ మొదలు పెట్టాడు. ఫైనల్గా అమ్మమ్మ అడ్రస్ కనుక్కుని వెళ్లాడు. మొదట్లో అనుమానించిన ఆమె, చివరకు తన బిడ్డకు మొదటి పెండ్లి ద్వారా ఓ కొడుకు పుట్టాడని, అతనిప్పుడు ఎక్కడున్నాడో తెలియదని చెప్పింది. దీంతో జగ్జీత్ కన్నీళ్లు పెట్టుకుంటూ అది తానే అని చెప్పుకున్నాడు. ఆపై తన తల్లి హర్జీత్ను చూసిన సంతోషంలో కన్నీళ్లు ఆపుకోలేకపోయాడు. ఐదేండ్ల కింద తన తల్లి బతికే ఉందని జగ్జీత్కు తెలిసేనాటికే తన తాత, నానమ్మ కూడా చనిపోయారు. దీంతో తల్లి వివరాలు తెలుసుకోలేకపోయాడు. ప్రస్తుతం జగ్జీత్కు భార్య, 14 ఏండ్ల బిడ్డ, 8 ఏండ్ల కొడుకు ఉన్నారు. ఎట్టకేలకు తల్లిని కలుసుకున్నానని జగ్జీత్ ఫేస్బుక్లో వెల్లడించాడు.