- 42% రిజర్వేషన్లపై మోదీతో నేను మాట్లాడుతా: ఆర్.కృష్ణయ్య
బషీర్బాగ్, వెలుగు: సర్పంచ్ ఎన్నికలను ఆపాలని, 42 శాతం రిజర్వేషన్లతోనే ఎలక్షన్లకు పోవాలని రాజ్యసభ సభ్యుడు ఆర్.కృష్ణయ్య ప్రభుత్వాన్ని కోరారు. ‘‘శీతాకాల పార్లమెంట్ సమావేశాల్లో భాగంగా బీసీల రిజర్వేషన్ల విషయమై ప్రధానమంత్రి నరేంద్ర మోదీతో నేను మాట్లాడుతా.
బీసీలకు రిజర్వేషన్లు దక్కేలా కృషి చేస్తా’’అని ఆయన పేర్కొన్నారు. జీవో 46ను రద్దు చేయాలని డిమాండ్ చేస్తూ తెలంగాణ విద్యార్థి సంఘం అధ్యక్షుడు పగిళ్ల సతీశ్ ఆధ్వర్యంలో గన్ పార్కు అమరవీరుల స్తూపం వద్ద చేపట్టిన ధర్నాలో ఆర్.కృష్ణయ్య పాల్గొని మాట్లాడారు. ‘‘ప్రభుత్వం వెంటనే జీవో 46ను రద్దు చేసి, జీవో 9ను పునరుద్ధరించాలి.
42 శాతం రిజర్వేషన్లతోనే స్థానిక సంస్థల ఎన్నికలకు పోవాలి. బీసీలకు 42 శాతం రిజర్వేషన్లపై రాష్ట్ర ప్రభుత్వం మొదటి నుంచి బాధ్యతాయుతంగా వ్యవహరించడం లేదు. రెండు సార్లు ఢిల్లీలో ధర్నాలు చేశారు కానీ.. ఏం లాభం లేదు. ప్రధానమంత్రి నరేంద్ర మోదీని ఎందుకు కలవలేదు? బిల్లు ఆమోదం కోసం కేంద్రంపై ఒత్తిడి ఎందుకు చేయడం లేదు? జీవో 9ను విడుదల చేసి 42 శాతం రిజర్వేషన్లపై బీసీల్లో ఆశలు కల్పించారు.
జీవో 9పై హైకోర్టులో వాదనలు జరుగుతున్నాయి. కేసు గెలిచే అవకాశం ఉన్నప్పటికీ ప్రభుత్వం ఆ దిశగా వాదనల వినిపించడం లేదు’’అని ఆర్.కృష్ణయ్య అన్నారు. తాజాగా తీసుకొచ్చిన జీవో 46ను కూడా సంక్రమంగా అమలు చేయడం లేదని, 30 మండలాల్లో ఒక్క బీసీకి కూడా రిజర్వేషన్ దక్కడం లేదని మండిపడ్డారు. ధర్నా కార్యక్రమంలో బీసీ కమిషన్ మాజీ చైర్మన్ వకుళభరణం కృష్ణమోహన్ రావు తదితరులు పాల్గొన్నారు.
