- ట్రిపుల్ ఐటీ చివరి సెమిస్టర్ పరీక్షలకు అనర్హులుగా ప్రకటన
- క్లాసులకు హాజరుకాకుండా 15 రోజుల సస్పెన్షన్
భైంసా, వెలుగు: నిర్మల్ జిల్లా బాసర ట్రిపుల్ఐటీలో ఇటీవల జరిగిన ర్యాగింగ్ ఘటనకు కారణమైన ఐదుగురు విద్యార్థులపై వీసీ చర్యలు తీసుకున్నారు. 15 రోజుల పాటు తరగతులకు హాజరుకాకుండా సస్పెండ్ చేయడంతో పాటు చివరి సెమిస్టర్పరీక్షలకు అనర్హులుగా ప్రకటిస్తూ వీసీ వెంకటరమణ ఆదేశాలు జారీ చేశారు. ఇటీవల పీయూసీ ఫస్ట్ ఇయర్, సెకండ్ఇయర్ విద్యార్థుల మధ్య ఘర్షణ జరిగిన సంగతి తెలిసిందే.
దీంతో ఫస్ట్ఇయర్ విద్యార్థులు సెకండ్ఇయర్ విద్యార్థులపై ఫిర్యాదు చేశారు. ఈ క్రమంలో వర్సిటీ ఆఫీసర్లు క్రమశిక్షణ కమిటీ, ర్యాగింగ్కమిటీలను ఏర్పాటు చేసి పలు దఫాలుగా విచారణ జరిపించారు. ఆ కమిటీల నివేదిక ఆధారంగా ఐదుగురు విద్యార్థులకు పనిష్మెంట్ ఇచ్చారు.
ట్రిపుల్ఐటీలో ఇద్దరు ఉద్యోగులపై వేటు
బాసర ట్రిపుల్ ఐటీలో అకౌంట్ సెక్షన్ కి చెందిన ఇద్దరు ఉద్యోగులను వీసీ వెంకటరమణ శుక్రవారం సస్పెండ్ చేశారు. డ్యూటీలో నిర్లక్ష్యం, యూనివర్సిటీకి సంబంధించిన విషయాలు బయటకి లీక్ చేస్తున్నారని చర్యలు తీసుకున్నట్టు తెలుస్తోంది.
స్టూడెంట్ను వేధిస్తున్నారని ఆరోపణలు ఎదుర్కొంటున్న ఈ ఇద్దరు ఉద్యోగులపై ఇప్పటికే విచారణ కొనసాగుతోంది. వేధింపుల విషయమై పూర్తిస్థాయి నివేదిక అందగానే ఇద్దరు ఉద్యోగులపై తదుపరి చర్యలు తీసుకునే అవకాశం ఉంది.
