గజ్వేల్, వెలుగు: రాష్ట్రంలో నిరుద్యోగులు రోడ్డున పడ్డరు.. కేసీఆర్ కుటుంబంలో మాత్రం అందరికీ ఉద్యోగాలు వచ్చాయని దుబ్బాక ఎమ్మెల్యే రఘునందర్ రావు విమర్శించారు. సోమవారం ఆయన సిద్దిపేట జిల్లా వర్గల్ మండలం అనంతగిరిపల్లి గ్రామంలో నిర్వహించిన కార్నర్ మీటింగ్లో మాట్లాడారు. ఎన్నికలప్పుడు కేసీఆర్ ఇచ్చిన వగ్దానాలన్నీ తప్పుడువేనని, దళిత సీఎం, డబుల్బెడ్ఇండ్లు ఇలా ఏ ఒక్క హామీ సరిగా అమలు చేయలేదని విమర్శించారు. వచ్చే ఎన్నికల్లో కేసీఆర్కు ప్రజలు తగిన బుద్ధి చెబుతారన్నారు.
ధరణి పేరుతో బీఆర్ఎస్ లీడర్ల భూదందా
మెదక్ (కౌడిపల్లి), వెలుగు: ధరణి పేరుతో బీఆర్ఎస్ లీడర్లు భూదందా చేస్తున్నారని ఎమ్మెల్యే రఘునందన్ రావు ఆరోపించారు. కౌడిపల్లి మండలం తిమ్మాపూర్లో సోమవారం రాత్రి జరిగిన బీజేపీ కార్నర్ మీటింగ్లో ఆయన మాట్లాడారు. నర్సాపూర్ నియోజకవర్గంలోని మండలాల్లో అధికార పార్టీ లలీడర్లు సర్వే నంబర్లు మార్చి పేదల భూములు లాక్కుంటూ రియల్ ఎస్టేట్ వ్యాపారం చేస్తూ లక్షలు సంపాదిస్తున్నారని, ఇది ఎమ్మెల్యే మదన్రెడ్డి అండదండలతోనే జరుగుతోందని ఆరోపించారు.
బీఆర్ఎస్ ది ప్రజా వ్యతిరేక పాలన..
నారాయణ్ ఖేడ్, వెలుగు: బీఆర్ఎస్ ది ప్రజా వ్యతిరేక పరిపాలన అని బీజేపీ రాష్ట్ర అధికార ప్రతినిధి సంగప్ప అన్నారు. మంగళవారం నారాయణఖేడ్ మండల పరిధిలోని హనుమంత రావు పేటతో పలు గ్రామాలలో, ఖేడ్ పట్టణంలోని అప్పారావు సర్కిల్ వద్ద ఏర్పాటుచేసిన కార్నర్ మీటింగ్లో జహీరాబాద్ పార్లమెంట్ ఇన్చార్జి రవి కుమార్ గౌడ్ తో కలిసి పాల్గొని మాట్లాడారు. రాష్ట్రంలో వచ్చే ఎన్నికల్లో బీజేపీ ప్రభుత్వం కచ్చితంగా ఏర్పడుతందని ధీమా వ్యక్తం చేశారు.
కేసీఆర్ సర్కారుకు చరమగీతం పాడుదాం
నర్సాపూర్, వెలుగు : ప్రజలను ఇబ్బంది పెడుతూ ప్రజా వ్యతిరేక పాలన సాగిస్తున్న కేసీఆర్ సర్కారుకు చరమగీతం పాడే రోజులు దగ్గర పడ్డాయని నర్సాపూర్ బీజేపీ అసెంబ్లీ కన్వీనర్ వాల్దాస్ మల్లేశ్ గౌడ్ అన్నారు. మంగళవారం నర్సాపూర్ మండలంలోని లింగాపూర్ గ్రామంలో ప్రజాగోస బీజేపీ భరోసా శక్తి కేంద్రం ఇన్చార్జి ప్రవీణ్ ఆధ్వర్యంలో నిర్వహించిన పార్టీ స్ట్రీట్ కార్నర్ మీటింగ్ లో రాష్ట్ర కార్యవర్గ సభ్యుడు సింగయ్యపల్లి గోపితో కలిసి ఆయన పాల్గొని పలు సూచనలు చేశారు.
