టీమిండియా బ్యాట్స్మెన్లు క్రీజులో ఉన్నారంటే చాలు.. ప్రత్యర్ధి బౌలర్లు ఆచితూచి బౌలింగ్ చేస్తారు. పుసుక్కున ఆ బ్యాటుకు బంతి దొరికిందంటే.. చాలు మనోళ్లు బౌండరీ బాదేస్తారు మరి. అయితే.. మనోళ్లు కొట్టే బౌండరీల వెనుక ఓ సిద్ధహస్తుడి కష్టం కూడా ఉంది. కోహ్లీ, రోహిత్ శర్మలతో పాటు టీమిండియా ఆటగాళ్లు వినియోగించే బ్యాట్ల రిపేర్, తయారీ అన్నీ చేసే ఓ వ్యక్తిని ఈరోజు పరిచయం చేసుకుందాం!
ఓ ఇంటర్నేషనల్ మ్యాచ్లో సచిన్ అవతలి టీమ్ బౌలర్ల బౌలింగ్ని చితక్కొట్టాడు. ఫలితంగా మనదేశం ఆ మ్యాచ్లో గెలిచింది. ఆ తర్వాత అందరూ సచిన్ బ్యాట్లో ఏదో మహత్తు ఉందన్నారు. అయితే.. అక్కడున్న అసలు విషయమేంటంటే.. అప్పటి వరకు సచిన్ బ్యాట్బరువు 1350 గ్రాములు. రామ్ భండారీ అనే బ్యాట్లు రిపేర్ చేసే వ్యక్తి ఆ బరువును 1250 గ్రాములకు తగ్గించాడు. అది తెలిసి సచిన్ కూడా ఆశ్చర్యపోయాడు. బరువు తగ్గినా.. బ్యాట్లో గ్రేస్ ఏ మాత్రం తగ్గకపోవడం చూసి రామ్ భండారిని కలుసుకోకుండా ఉండలేకపోయాడు. బ్యాట్ భారం తగ్గించి.. పరుగులు పెరిగేలా చేసిన రామ్ భండారి గురించి తెలుసుకోకపోతే ఎట్ల?
భండారి.. భలే బ్యాటుకాడు..
బెంగళూరులోని ఉత్తరహల్లి అనే ప్రాంతంలో ఉంటాడు. సొంతూరు బీహార్లోని భికన్ తోరి అనే టౌన్. పెద్దగా చదువుకోలేదు. ఏదైనా పని చేసుకుందామని బెంగళూరుకు వచ్చాడు. తాత నుంచి నేర్చుకున్న వడ్రంగి పని మాత్రమే తెలుసు. అదే తనకు తిండి పెడుతుందని అర్థమైంది. బాగా ఆలోచించి స్పోర్ట్స్ ఐటమ్స్ అమ్మే షాప్ పెట్టాడు. ఒకవైపు ఆట వస్తువులు అమ్ముతూ.. బ్యాట్లు తయారుచేయడం, డ్యామేజ్అయిన బ్యాట్లు రిపేరు చేయడం పనిగా పెట్టుకున్నాడు. క్రమంగా భండారి చేసే బ్యాట్లకు డిమాండ్ పెరిగింది. జూనియర్ క్రికెటర్లంతా భండారి దగ్గరే బ్యాట్లు కొనుక్కునేవారు. కొన్నిరోజుల తర్వాత బ్యాట్డ్యామేజ్ అయితే.. రిపేర్ కోసం భండారి దగ్గరికే వచ్చేవాళ్లు. భండారి తన అనుభవంతో పాడైపోయిన బ్యాట్ను తిరిగి కొత్త బ్యాట్లా మార్చి ఇచ్చేవాడు. క్రమంగా భండారి గురించి సీనియర్ క్రికెటర్లకు తెలిసింది. సీనియర్ క్రికెటర్లు కూడా భండారి దగ్గర బ్యాట్లు రిపేర్ చేయించుకునేవారు. ఓ దశలో ఆయన తయారుచేసిన బ్యాట్తో మాత్రమే ఆడారు కూడా.
మహామహులే క్యూ కట్టారు..
ఇది అక్కడితో ఆగలేదు.. మెల్లమెల్లగా రంజీ ట్రోఫీ క్రికెటర్లు కూడా భండారి బ్యాట్లకు ఫ్యాన్స్ అయిపోయారు. అదే సమయంలో అప్పటి స్టార్ క్రికెటర్, మిస్టర్ వాల్ రాహుల్ ద్రవిడ్తో భండారికి పరిచయమైంది. ఆ పరిచయంలో భాగంగా ఒకసారి రాహుల్ ద్రవిడ్ తన పాడైపోయిన బ్యాట్ని రిపేర్ చేయమని భండారికి ఇచ్చాడు. ఆ బ్యాట్ను మరమ్మత్తు చేసి కొత్తదానిలా రూపురేఖలు మార్చేశాడు భండారి. అది రాహుల్కి బాగా నచ్చడంతో అప్పటి నుంచి తన బ్యాట్ల రిపేర్ పూర్తిగా అతనికే అప్పజెప్పాడు. రాహుల్తో పాటు సౌరవ్ గంగూలీ, సచిన్ టెండూల్కర్ కూడా భండారి దగ్గరే బ్యాట్లు రిపేర్ చేయించుకునేవారు. ఒక్కసారి భండారి చెయ్యి పడిన బ్యాట్ పడితే.. వేరే బ్యాట్ పట్టుకోవడానికి మనసొప్పదు. బ్యాట్ తయారీ, రిపేరు చేయడంలో అంతటి ఎక్స్పర్ట్ అతను.
మన ఆటగాళ్లకు..
బ్యాట్స్మెన్ తన బ్యాట్ ఎలా ఉండాలనుకుంటున్నాడో ఒక్కసారి చెప్తే చాలు.. అచ్చం అలాగే.. ఏ మాత్రం తేడా లేకుండా బ్యాట్ తయారుచేయడం, రిపేర్ చేయడం భండారి స్పెషాలిటీ. ప్లాస్టరింగ్, సీజనింగ్, బ్యాలెన్సింగ్ ఏదైనా సరే.. బ్యాట్స్మెన్ కోరుకున్నట్టుగా బ్యాట్ రూపొందించడం భండారికి తెలిసిన విద్య. బ్యాట్తో మైదానంలో సిక్సులు, ఫోర్లు బాదాలంటే దాని బరువు, బ్యాలెన్స్, స్ట్రోక్, వంపు చాలా ముఖ్యం. బ్యాట్స్మెన్ బరువు, ఎత్తును బట్టి బ్యాట్ ఎలా ఉండాలో చిటికెలో చెప్పేస్తాడు భండారి. ఇప్పుడు జరుగుతున్న వరల్డ్కప్లో టీమిండియా ఆటగాళ్లు ఆడే బ్యాట్ల రిపేర్ రామ్ భండారియే చేస్తున్నాడు. కోహ్లీ, రోహిత్ ఈ వరల్డ్ కప్లో తమకు కావల్సినట్టుగా దగ్గరుండి మరీ భండారీతో బ్యాట్ తయారు చేయించుకున్నారు.
విదేశీ క్రికెటర్లకు…
రికీపాంటింగ్, దిల్షాన్, చంద్రపాల్ వంటి విదేశీ క్రికెటర్లు సైతం భండారి దగ్గర తమ బ్యాట్కు మెరుగులు దిద్దించుకుంటారు. ఇంగ్లాండ్, ఆస్ట్రేలియా ఆటగాళ్లు ఇప్పటికీ భండారి దగ్గరే తమ బ్యాట్లు రిపేర్ చేయించుకుంటారు. ప్రపంచవ్యాప్తంగా తనకు ఇంత క్రేజ్ ఉన్నప్పటికీ భండారి మాత్రం ‘నాకు డబ్బు ముఖ్యం కాదు. బ్యాట్ తయారుచేయడం, ఆటగాడికి నచ్చేలా దాన్ని డిజైన్ చేయడం నా పని. బ్యాట్ అద్భుతంగా తయారుచేశాడు అనిపించుకోవడం నాకు ప్యాషన్. నేను చేసిన పని ఆటగాడికి నచ్చితే నాకు అదే చాలు’ అంటూ సంతృప్తి పడతాడు.
