ఎల్బీ నగర్,వెలుగు: అబ్దుల్లాపూర్మెట్ మండలం బండరావిరాల పరిధిలో మైనింగ్ వద్దంటూ నిర్వాసితుల ఆందోళన నేపథ్యంలో రాష్ట్ర కాలుష్య నియంత్రణ మండలి ఆధ్వర్యంలో కలెక్టర్ అమోయ్ కుమార్ మంగళవారం ప్రజాభిప్రాయ సేకరణ నిర్వహించారు. మైనింగ్ జోన్లో భూములు కోల్పోయిన రైతులు, మైనింగ్ వల్ల సమస్యలు ఎదుర్కొంటున్న ప్రజల నుంచి అభిప్రాయాలను సేకరించారు. ఈ సందర్భంగా బాధితులు మాట్లాడుతూ.. కొంతమంది లీడర్లు, క్రషర్స్ యాజమాన్యాలు పే కూలీలను తీసుకువచ్చి బాధితులకు అన్యాయం చేస్తున్నారని ఆందోళనకు దిగారు. హాని కలిగించే మైనింగ్ను తొలగించాలని డిమాండ్ చేశారు. అయితే తమ అభిప్రాయం లేకుండా క్రషర్ యజమానులకు అనుకూలమైన వారితో పాటు, ఇతర ప్రాంతాలవారి అభిప్రాయ సేకరణ చేశారని వారు ఆవేదన చెందారు. మైనింగ్ జోన్లో భూములు కోల్పోయిన రైతులు నష్టపరిహారం కోసం నేటికీ పోరాడుతూనే ఉన్నారని, నాయకులు హామీ ఇచ్చినా నేటికీ న్యాయం చేయడం లేదని తెలిపారు. మైనింగ్ జోన్ ప్రాంతంలో సొంత పొలాల్లోకి వెళ్లాలంటే భయంగా ఉంటుందని, బ్లాస్టింగ్ వల్ల ఎప్పుడు ఏ రాయి వచ్చి మీద పడుతుందని ఆందోళన వ్యక్తం చేశారు. బ్లాస్టింగ్ తో చిన్నపిల్లలు అవిటివారిగా తయారవుతున్నారని , అనేక మంది ఊపిరితిత్తుల సమస్యతో బాధ పడుతూ చనిపోయిన రోజులు ఉన్నాయని బాధితులు పేర్కొన్నారు. నిర్వాసితులకు ప్రభుత్వం తక్షణమే న్యాయం చేయాలని డిమాండ్ చేశారు. ఈ కార్యక్రమంలో ఆర్డీఓ వెంకటచారి, తహసీల్దార్తదితరులు పాల్గొన్నారు.
