రాష్ట్ర వైద్య విధాన పరిషత్‌ స్పెషలిస్ట్‌ డాక్టర్ల తొలగింపు ఫైల్ ప్రభుత్వం వద్దకు చేరింది. తొలగింపుకు న్యాయ ప్రక్రియ అడ్డంరాకుండా ఒకట్రెండు రోజుల్లో గెజిట్ నోటిఫికేషన్‌ ఇవ్వనున్నారు. టీవీవీపీ పరిధిలోని దవాఖాన్లలో పనిచేస్తూ.. ఆబ్సెంట్ అవుతున్న 134 మంది స్పెషలిస్ట్‌ డాక్టర్లకు ఈ మధ్యే నోటీసులు ఇచ్చిన సంగతి తెలిసిందే. అయితే, వీరిలో 86 మంది నోటీసులకు స్పందించలేదు. దీంతో వారందరినీ తొలగించేందుకు టీవీవీపీ ఉన్నతాధికారులు ప్రతిపాదనలు సిద్ధం చేసి, సాధారణ పరిపాలనశాఖ(జీఏడీ)కు పంపించారు. ఈ 86 మంది వివరాలతో జీఏడీ గెజిట్ విడుదల చేయనుంది. వివరణ ఇచ్చేందుకు వారం రోజుల సమయం ఇచ్చి, స్పందించని డాక్టర్లను ఉద్యోగం నుంచి శాశ్వతంగా తొలగిస్తామని ఉన్నతాధికారులు వివరించారు.
