అధికారం ఉందని విర్రవీగుతున్నడు

• సీఎంపై అన్ని పోలీస్​ స్టేషన్లలో ఫిర్యాదు చేయాలని పీసీసీ చీఫ్​ పిలుపు
• ముగిసిన కాంగ్రెస్​ 48 గంటల దీక్ష

హైదరాబాద్​, వెలుగు: అధికారం ఉందని కేసీఆర్​ విర్రవీగుతున్నారని, ఆయన పొగరును అణచేసే టైం వచ్చిందని పీసీసీ చీఫ్​ రేవంత్​రెడ్డి అన్నారు. కొత్త రాజ్యాంగం కావాలన్న సీఎం కేసీఆర్​ మాటలను తేలిగ్గా తీసుకోవద్దని, ఆ మాటల వెనుక బీజేపీ కుట్ర ఉందని అన్నారు. చైనాకు జీవితాంతం అధ్యక్షుడిగా ఉండేందుకు షి జిన్​పింగ్​ రాజ్యాంగాన్ని మార్చారని, రష్యా, ఉత్తర కొరియాలోనూ అదే పరిస్థితి ఉందన్నారు. ఇక్కడ కూడా కేసీఆర్​, ప్రధాని మోడీ అలాంటి ఆలోచనలే చేస్తున్నారని మండిపడ్డారు. రష్యా, చైనా అధ్యక్షులను మోడీ స్ఫూర్తిగా తీసుకుంటే.. కొరియా లీడర్​ కిమ్​ జోంగ్​ఉన్​ను కేసీఆర్​ స్ఫూర్తిగా తీసుకున్నారని ఆగ్రహం వ్యక్తం చేశారు. కేసీఆర్​ వ్యాఖ్యలకు నిరసనగా గాంధీభవన్​లో ‘రాజ్యాంగాన్ని కాపాడుకుందాం’ అనే నినాదంతో చేపట్టిన 48 గంటల దీక్ష ముగింపు కార్యక్రమంలో ఆయన మాట్లాడారు. రాష్ట్రవ్యాప్త ఆందోళనలకు పిలుపునిచ్చారు. శనివారం రాష్ట్రంలోని అన్ని పోలీస్​స్టేషన్లలోనూ కేసీఆర్, టీఆర్​ఎస్​ నేతలపై ఫిర్యాదు చేయాలని కాంగ్రెస్​ శ్రేణులకు సూచించారు. ఆదివారం అంబేద్కర్​ విగ్రహాలకు పాలతో అభిషేకం చేయాలన్నారు. సోమవారం పార్లమెంట్​లో నిరసన చేస్తామని చెప్పారు. 

రాజ్యాంగం లేకుండే: భట్టి

రాజ్యాంగంపై చేసిన వ్యాఖ్యలను బట్టి కేసీఆర్​ ఎన్నికలకు అనర్హుడని సీఏల్పీ నేత భట్టి విక్రమార్క విమర్శించారు. ఆయన్ను సీఎం పదవి నుంచి తొలగిస్తేనే రాజ్యాంగానికి గౌరవమన్నారు. రాజకీయాల్లోకి సీఎం కేసీఆర్​ ​బూతులను తీసుకొచ్చారన్నారు. జనానికి హక్కులు కల్పించిన పవిత్ర పుస్తకం రాజ్యాంగమని అన్నారు. రాజ్యాంగమే లేకుంటే ఇప్పుడు రాజులు, రాజ్యాలు మాత్రమే ఉండేవన్నారు. కేసీఆర్​ వ్యాఖ్యలకు నిరసనగా ఆరు నెలలపాటు అంబేద్కర్​ విగ్రహాలకు పాలతో అభిషేకం చేస్తామన్నారు. కేసీఆర్​ రంగులు మార్చే ఊసరవెల్లి అని పీఏసీ కన్వీనర్​ షబ్బీర్​ అలీ ఆగ్రహం వ్యక్తం చేశారు. చిన్న రాష్ట్రాల ఏర్పాటు మంచిదని అంబేద్కర్​​రాజ్యాంగంలో చెప్పడం వల్లే కేసీఆర్​ సీఎం అయ్యారని పీసీసీ వర్కింగ్​ ప్రెసిడెంట్​ గీతారెడ్డి అన్నారు. జైలుకు వెళ్తానన్న భయంతోనే కేసీఆర్​ కొత్త నాటకానికి తెరదీశారన్నారు. 

పదవుల కోసం దిగజారుతున్నరు

ప్రపంచంలోనే అతిపెద్ద ప్రజాస్వామ్య దేశంగా ఇండియాను నిలబెట్టడంలో అంబేద్కర్​ కృషి ఎంతో ఉందని, మన రాజ్యాంగం గొప్పదనం ప్రపంచ దేశాలకు తెలిసినా కేసీఆర్​కు తెలియకపోవడం విచారకరమని రేవంత్​ విమర్శించారు. పదవులు, కుర్చీల కోసం కేశవరావు, కడియం శ్రీహరి లాంటి నేతలు దిగజారిపోయి కేసీఆర్​ మాటలను సమర్థిస్తున్నారని మండిపడ్డారు. ఆ నేతలే ఇలా దిగజారిపోతే సమాజానికి రక్షణ ఉంటుందా అని ప్రశ్నించారు. రాజ్యాంగాన్ని మార్చాలన్న కేసీఆర్​ ఆలోచన గొప్పదంటూ కేశవరావు చట్టసభల్లోనే మాట్లాడేంతగా బరితెగించారన్నారు. ఆయన జ్ఞానం ఏమైందని, ఆ జ్ఞానానికి కరోనా ఏమైనా వచ్చిందా అని ప్రశ్నించారు. రాష్ట్రంలో అంతో ఇంతో గౌరవమున్న కడియం కూడా పదవి కోసం లాలూచీ పడాల్సిన అవసరముందా అన్నారు.