- బెస్ట్ ఫర్ బ్రిటన్ ఫోకల్ డేటా పోలింగ్లో వెల్లడి
- ఆయనతో పాటు 15 మంది మంత్రులూ ఔట్
- సొంత పార్టీ మద్దతుదారుల నుంచే వ్యతిరేకత
- బోరిస్ జాన్సన్ను మళ్లీ తీసుకొచ్చేందుకు ప్రయత్నాలు
లండన్ : బ్రిటన్ ప్రధాని రుషీ సూనక్కు పదవీ గండం పొంచి ఉంది. ఆయనతో పాటు కేబినెట్లోని మరో 15 మంది మంత్రుల పదవులూ ఊష్ట్ అయ్యే అవకాశాలున్నాయట. 2024లో జరిగే జనరల్ ఎలక్షన్స్లో వాళ్లంతా వారి సొంత స్థానాల్లోనే ఓడిపోతారని ‘బెస్ట్ ఫర్ బ్రిటన్’ అనే సంస్థ చేసిన ‘ఫోకల్ డేటా పోలింగ్’ సర్వేలో తేలింది. సూనక్తో పాటు డిప్యూటీ ప్రధాని డొమినిక్ రాబ్, ఆరోగ్య శాఖ మంత్రి స్టీవ్ బార్క్లే, విదేశాంగ శాఖ మంత్రి జేమ్స్ క్లవర్లీ, రక్షణ మంత్రి బెన్ వాలేస్, వాణిజ్య శాఖ మంత్రి గ్రాంట్ షాప్స్, కామన్స్ లీడర్ పెన్నీ మోర్డాంట్, పర్యావరణ శాఖ మంత్రి థెరీసా కాఫీ వంటి వాళ్లూ ఓడిపోతారని సర్వే వెల్లడించింది. జెరెమీ హంట్, భారత సంతతికి చెందిన సువెల్లా బ్రేవర్మాన్, మైకేల్ గోవ్, నదీమ్ జవావి, కెమీ బాడినోక్ మాత్రమే ఎన్నికల్లో నెగ్గుతారని పేర్కొంది.
ఇన్నాళ్లూ అధికార కన్జర్వేటివ్ పార్టీకి కంచుకోటలైన 10 స్థానాలు లేబర్ పార్టీ ఖాతాలో పడే అవకాశముందని వివరించింది. సూనక్ పదవితో పాటు అధికార పార్టీకీ నష్టం తప్పకపోవచ్చని పేర్కొంది. ప్రస్తుతానికి లేబర్ పార్టీ 20 పాయింట్లు లీడ్లోనే ఉందని, అయితే, చపలచిత్తమైన ఓటర్లతో ఎన్నికల టైం నాటికి ఆ లీడ్ తగ్గే ఆస్కారమూ ఉంటుందని తెలిపింది. తన చరిష్మాను పెంచుకునేందుకు, బ్రిటన్ ఆర్థిక వ్యవస్థను గాడిలో పెట్టేందుకు ఇటీవలే ఐదు హామీలను సూనక్ ప్రకటించినా.. అవేవీ పెద్దగా ఆయనకు కలిసొచ్చేలా లేవని సర్వే వివరించింది.
ఇటు సొంత పార్టీలోని మద్దతుదారులే ఆయనకు వ్యతిరేకంగా వ్యవహరించే ఆస్కారమున్నట్టు చెప్తున్నారు. మాజీ ప్రధాని బోరిస్ జాన్సన్ను మరోసారి ప్రధాని అభ్యర్థిగా ముందుకు తీసుకొచ్చే అవకాశముందంటున్నారు. నిరుడు జులైలో సూనక్ రాజీనామా చేయడం వల్లే బోరిస్ జాన్సన్ ప్రభుత్వం కూలిపోయిందని ఆయన మద్దతుదారులు ఇప్పటికే సూనక్పై గుర్రుగా ఉన్నారు. ఈ నేపథ్యంలోనే తాజా సర్వే ప్రాధాన్యం సంతరించుకుంది.
