మిర్యాలగూడ, వెలుగు : నల్గొండ జిల్లా మిర్యాలగూడ మండలం కొత్తగూడెం గ్రామ శివార్లలో బైక్ అదుపుతప్పి రోడ్డు వెంట ఉన్న సమాధిని ఢీకొట్టడంతో మేనమామ, మేనల్లుడు చనిపోయారు. రూరల్ పోలీసులు, స్థానికుల కథనం ప్రకారం..కొత్తగూడెం గ్రామానికి చెందిన గర్నె శ్రీలత, సైదులు దంపతులు. శ్రావణ మాసం పురస్కరించుకుని గ్రామ శివార్లలోని మిట్టగూడెం రోడ్డు పక్కన పొలాల వైపు వన భోజనాలను ఏర్పాటు చేశారు.
ఇదే వేడుకకు మహాబూబాబాద్ జిల్లా జయరాం గ్రామానికి చెందిన శ్రీలత సోదరుడు జాకటి నవీన్ వచ్చాడు. వనభోజనాలు ముగిశాక మేనల్లుడు సందీప్(18)తో కలిసి బైక్పై ఇంటికి బయలుదేరారు. కొద్ది దూరం రాగానే బైక్ అదుపు తప్పి రోడ్డు పక్కనే ఉన్న సమాధిని ఢీకొట్టింది. ఈ ప్రమాదంలో ఇద్దరూ తీవ్రంగా గాయపడి దవాఖానాకు తరలిస్తుండగా చనిపోయారు. కన్న కొడుకు, పేగు పంచుకు పుట్టిన సోదరుడు ఒకే యాక్సిడెంట్లో చనిపోవడం ఆ తల్లికి తీరని ఆవేదనను మిగిల్చింది.
