- వృద్ధురాలి కంట్లో కారం కొట్టి.. గోల్డ్ చైన్ల రాబరీ
- వనస్థలిపురంలోని సహారా ఎస్టేట్లో ఘటన
ఎల్బీనగర్, వెలుగు: చుట్టూ ఫెన్సింగ్, సీసీ కెమెరాలు, భద్రతా సిబ్బందితో నిత్యం నిఘా నీడలో ఉండే.. హై సెక్యూరిటీ గేటెడ్ కమ్యూనిటీలో దోపిడీ జరిగింది. వృద్ధురాలి కంట్లో కారం కొట్టి, చెయ్యి కొరికి.. ఆమె మెడలోని గోల్డ్చైన్లను దుండగులు ఎత్తుకెళ్లారు. రిటైర్డ్ డాక్టర్ నిరంజన్ (77), రామసుందరి (63) దంపతులు. వీరికి ఒక కొడుకు ఉండగా, లండన్లో సెటిలయ్యాడు.
వృద్ధ దంపతులిద్దరూ రంగారెడ్డి జిల్లా వనస్థలిపురంలోని సహారా ఎస్టేట్ గేటెడ్కమ్యూనిటీలో విల్లా తీసుకొని అక్కడే నివాసం ఉంటున్నారు. శుక్రవారం ఉదయం భర్త నిరంజన్ వాకింగ్కు వెళ్లగా, రామసుందరి ఇంట్లో ఒంటరిగా ఉంది. ఈ సమయంలో గుర్తుతెలియని మహిళ మాస్క్ధరించి ఇంట్లోకి ప్రవేశించింది. ఆమె కంట్లో కారం కొట్టి, మెడలోని 6 తులాల రెండు గోల్డ్చైన్లు (ఒక్కొక్కటి 3 తులాలు) తీసే ప్రయత్నం చేసింది.
వృద్ధురాలు ప్రతిఘటించగా, ఆమె చేతిని కొరికి పరారైంది. ఈ ఘటనపై బాధితుల ఫిర్యాదుతో పోలీసులు దర్యాప్తు చేస్తున్నారు. సీసీ ఫుటేజీ ఆధారంగా నిందితురాలి కోసం గాలిస్తున్నారు. హై-సెక్యూరిటీ గేటెడ్ కమ్యూనిటీలో ఈ దోపిడీ జరగడం.. భద్రతా వైఫల్యంపై అనుమానాలను రేకెత్తిస్తోంది. దుండగుడు మహిళ వేషంలో కూడా వచ్చి ఉండవచ్చనే అనుమానం వ్యక్తమవుతోంది.
