- పల్లె, పట్టణాల మధ్య విస్తృతం చేసేందుకు ఆర్టీసీ ప్రణాళికలు
హైదరాబాద్, వెలుగు: పల్లె నుంచి పట్టణానికి, పట్టణం నుంచి పల్లెకు రైతు ఉత్పత్తులు, వ్యవసాయ పనిముట్లు, ఇతర పరికరాలను అనుకున్న సమయంలో, తక్కువ ధరకే చేరవేసే కార్గో సేవలను రాష్ట్రవ్యాప్తంగా విస్తృతం చేసే ప్లాన్ లో ఆర్టీసీ యాజమాన్యం ఉంది.
2047 తెలంగాణ రైజింగ్ విజన్ డాక్యుమెంట్ లో ఈ విషయాన్ని ఆర్టీసీ యాజమాన్యం పేర్కొన్నది. దీన్ని సీఎం రేవంత్ రెడ్డికు ఆ సంస్థ నివేదించింది. గ్రామీణ ప్రాంతాలు, పట్టణ కేంద్రాల మధ్య అన్ని రకాల అవసరాలను తీర్చేందుకు ఈ కార్గో సేవలను విస్తృతం చేసే విషయంపై ఆర్టీసీ యాజమాన్యం తగిన ప్రణాళికలను సిద్ధం చేస్తున్నట్లు అందులో పేర్కొన్నది.
ఇప్పటికే ఆర్టీసీ పల్లె వెలుగు పేరుతో గ్రామీణ ప్రాంతాల్లో ప్రజలకు రవాణా సేవలను అందిస్తున్నదని, ప్రాంతీయ ఆర్థిక కారిడార్ లో వ్యవసాయ.. లాజిస్టిక్ కు కీలకమైన సహాయం చేయడంలో ఆర్టీసీ తన కార్గో సేవలను విస్తృతం చేయనున్నదని రాష్ట్ర ప్రభుత్వానికి తెలియజేసింది. ఇది రైతులకు వారితో పాటు మైక్రో, స్మాల్, మీడియం ఎంటర్‌‌‌‌ప్రైజెస్ (ఎంఎస్ఎంఈ)కు లాజిస్టిక్ ఖర్చులను బాగా తగ్గించడంతో పాటు గ్రామీణ ప్రాంతాల్లో కార్గో సేవలను, బస్సు మార్గాలను మరింత చేరువ చేయనున్నదని ఆ విజన్ డాక్యుమెంట్ లో ఆర్టీసీ యాజమాన్యం తెలిపింది.
