రాష్ట్రంలో మహిళలకు మరింత భద్రత కల్పించే లక్ష్యంతో ‘విమెన్ సేఫ్టీ వింగ్ ’ ఏర్పాటైంది. రాష్ట్రవ్యాప్తంగా మహిళలపై జరుగుతున్న దాడులు, భద్రత, నిందితులకు శిక్షలు పడేలా తీసుకోవలసిన చర్యలను పర్యవేక్షించేందుకు దీనిని ఏర్పాటు చేశారు. హైదరాబాద్ లక్టీకాపూల్ లో ఏర్పాటు చేసిన ఈ ప్రత్యేక విభాగాన్ని శుక్రవారం మహిళా దినోత్సవం సందర్భంగా ఎంపీ కవిత ప్రారంభించారు. తర్వాత విమెన్ సేఫ్టీ వింగ్ వెబ్ సైట్, బ్రోచర్ను హోంమంత్రి మహమూద్ అలీ, డీజీపీ మహేందర్రెడ్డి ప్రారంభించారు. తర్వాత ఎంపీ కవిత మాట్లాడారు . అంతర్జాతీయ మహిళా దినోత్సవం సందర్భంగా రాష్ట్ర మహిళలకు శుభాకాంక్షలు తెలిపారు. దేశంలో ఎక్కడా లేని విధంగా తెలంగాణలో మహిళా సెక్యూరిటీకి చర్యలు చేపడుతున్నామని చెప్పారు . సీఎం కేసీఆర్ పోలీస్ డిపార్ట్ మెంట్ కు కావలసిన అన్ని వనరులు ఇచ్చారని, దాంతో దేశానికే దిక్సూచిగా మారిందని అన్నారు . ఆపదలో ఉన్న మహిళల రక్షణ కోసం తీసుకువచ్చిన షీటీమ్స్ మంచి ఫలితాలు సాధించాయన్నారు . హైదరాబాద్లో అమ్మాయిలు అర్ధరాత్రి కూడా భయాందోళన లేకుండా తిరగగలుగుతున్నారని చెప్పారు . అయితే మహిళలపై దాడులు పెరుగుతుండటం దురదృష్టకరమని, అలాంటి వాటిని నివారించేందుకు ప్రతీ మహిళా కృషి చేయాలని పిలుపునిచ్చారు.
24 గంటలూ అందుబాటులో : మహమూద్ అలీ
విమెన్ సేఫ్టీవింగ్ ప్రతి రోజూ, 24 గంటల పాటు అందుబాటులో ఉంటుందని హోం మంత్రి మహమూద్ అలీ చెప్పారు. రాష్ట్రంలో పోలీస్ వ్యవస్థ బాగా పనిచేస్తోందని, సీఎం కేసీఆర్ మహిళల భద్రతకు తొలి ప్రాధాన్యం ఇచ్చారని తెలిపారు. షీ టీమ్స్ తో పాటు భరోసా సెంటర్‌ కు ప్రపంచ వ్యాప్తంగా గుర్తింపు వచ్చిందని డీజీపీ మహేందర్ రెడ్డి చెప్పారు. అన్ని జిల్లాల్లో భరోసా సెంటర్లు ఏర్పాటు చేస్తున్నామన్నారు . మహిళలపై జరుగుతున్న వేధింపులను పరిశీలిస్తామని, వేగంగా దర్యాప్తు, విచారణ పూర్తి చేసేలా చర్యలు చేపడతామని విమెన్స్ సేఫ్టీ వింగ్ కు నేతృత్వం వహిస్తున్న ఐజీ స్వాతి లక్రా చెప్పారు . మహిళలకు ఎలాంటి పోలీసు, న్యాయపరమైన సహాయం కావాలన్నా విమెన్ సేఫ్టీ వింగ్ కు రావొచ్చని, సూచించారు.
