చేవెళ్ల, వెలుగు: బోనాల ఉత్సవాలను చూసేందుకు వచ్చిన దళితుడిపై ఓ గ్రామ సర్పంచ్, అతడి అనుచరులు దాడి చేసి తీవ్రంగా గాయపరిచారు. స్థానికులు, పోలీసులు తెలిపిన వివరాల ప్రకారం.. రంగారెడ్డి జిల్లా చేవేళ్ల మండలం పరిధిలోని మల్కాపూర్ గ్రామంలో శుక్రవారం సాయంత్రం బోనాల పండగ జరిగింది. అదే గ్రామానికి చెందిన ఓ వ్యక్తి బోనాలు చూసేందుకు గుడి దగ్గరకు వెళ్లాడు. గ్రామ సర్పంచ్ శేరి శివారెడ్డి, అతడి అనుచరులు ఆ వ్యక్తిని అడ్డుకున్నారు. ‘మా బోనాలను చూసేందుకు ఎట్లొస్తవ్’ అంటూ కులం పేరుతో తిట్టి దాడి చేశారు.
గాయపడ్డ బాధితుడిని గ్రామస్తులు మొయినాబాద్లోని ప్రైవేటు హాస్పిటల్కు తరలించారు. శనివారం మధ్యాహ్నం వరకు దాడికి పాల్పడ్డ వారిని అరెస్ట్ చేయకపోవడంతో పోలీసుల తీరుపై ప్రజాసంఘాల నేతలు ఆగ్రహం వ్యక్తం చేశారు. చేవెళ్ల పీఎస్ ఎదుట మెయిన్ రోడ్డుపై బైఠాయించి నిరసన తెలిపారు. ఈ ఘటనపై విచారణ జరిపి నిందితులపై కేసు నమోదు చేస్తామని పోలీసులు హామీ ఇవ్వడంతో వారు ధర్నాను విరమించారు.
