న్యూఢిల్లీ: ఎలక్టోరల్ బాండ్లకు సంబంధించిఎన్నికల కమిషన్కు ఇచ్చిన వివరాలను సమాచార హక్కు చట్టం (ఆర్టీఐ) కింద ఇచ్చేందుకు స్టేట్ బ్యాంక్ ఆఫ్ ఇండియా (ఎస్బీఐ) నిరాకరించింది. ఎలక్టోరల్ బాండ్స్ స్కీమ్ చట్టబద్ధం కాదని ఇటీవల సుప్రీంకోర్టు తీర్పులో వెల్లడించిన విషయం తెలిసిందే. బాండ్ల వివరాలను ఈసీకి ఇవ్వాలని, వాటిని వెబ్సైట్లో ఉంచాలంటూ పేర్కొంది. దీంతో ఎస్బీఐ సమర్పించిన వివరాలను ఈసీ మార్చి 14న తన వెబ్సైట్లో ఉంచింది. ఆర్టీఐ కార్యకర్త లోకేశ్ బాత్రా ఎలక్టోరల్ బాండ్ల పూర్తి వివరాలు కావాలంటూ మార్చి 13న ఎస్బీఐకి ఆర్టీఐ చట్టం కింద అప్లికేషన్ పెట్టుకున్నారు.
దాన్ని ఎస్బీఐ తిరస్కరించింది. సమాచారహక్కు చట్టంలోని రెండు క్లాజులను ప్రస్తావిస్తూ.. విశ్వసనీయ సమాచారం, వ్యక్తిగత వివరాలు ఉన్న కారణంగా వాటిని ఇవ్వలేమంటూ దరఖాస్తును తిరస్కరించింది. ఎస్ బీఐ తరఫున సుప్రీంకోర్టులో బాండ్ల కేసును వాదించిన లాయర్ హరీశ్ సాల్వేకు చెల్లించిన ఫీజు వివరాలు ఇవ్వాలని బాత్రా దరఖాస్తులో కోరారు. ఆ వివరాలను కూడా ఎస్బీఐ ఇవ్వలేదు. ఈసీ వెబ్సైట్ లో ఉన్న వివరాలు ఇచ్చేందుకు ఇబ్బంది ఏముందని బాత్రా ప్రశ్నించారు.
