సముద్రం లోపలి నుంచి విడుదలవుతున్న మీథేన్ గ్యాస్
ప్రపంచ సగటు కన్నా 9 రెట్లు ఎక్కువంటున్న సైంటిస్టులు
80 మంది సైంటిస్టుల రీసెర్చ్
సముద్రం అడుగునా పెర్మాఫ్రోస్ట్లు
సైబీరియా సముద్రం అడుగున పెర్మాఫ్రోస్ట్లున్నాయని సైంటిస్టులు చెబుతున్నారు. ఉత్తర నార్వే, రష్యాల్లోని బారెంట్స్ సముద్రం అడుగు భాగంలో వందల కొద్దీ పెద్ద పెద్ద గోతులను 2017లో సైంటిస్టులు గుర్తించారు. మీథేన్ వాయువు భారీగా విడుదలయ్యే టైంలో పేలి ఈ గోతులు ఏర్పడ్డాయని నిర్ధారించారు. బెనెట్ ఐల్యాండ్ చుట్టుపక్కల ఉన్న సముద్రాల నీళ్లు, అక్కడి పూడికలను తీసుకుని కారణాలను అంచనా వేస్తున్నారు. ఒక ప్రాంతంలోనైతే ఊహించిన దాని కన్నా ఎక్కువ మీథేన్ ఉన్నట్టు తేల్చారు.
సైబీరియా సంద్రం మసిలిపోతోంది. మీథేన్ బుడగలను వెదజల్లుతూ మరిగిపోతోంది. తూర్పు ఆర్కిటిక్ పెర్మాఫ్రోస్ట్ (శాశ్వతంగా మంచు ఉండే ప్రాంతం) తరిగిపోతుండడం వల్ల సైబీరియాపై పడుతున్న ప్రభావాలను తెలుసుకునేందుకు వెళ్లిన 80 మంది సైంటిస్టులు ఈ షాకింగ్ విషయాన్ని గుర్తించారు. సముద్రం అడుగు భాగం నుంచి మీథేన్ బుడగలు వస్తుండడం వల్లే ఇలా సముద్రం వేడెక్కుతోందని చెబుతున్నారు. ప్రపంచ సగటుతో పోలిస్తే తూర్పు సైబీరియా సముద్రంలో మీథేన్ పరిమాణం ఆరు నుంచి ఏడు రెట్లు ఎక్కువగా ఉందని అంటున్నారు. ‘‘నేను ఇప్పటిదాకా చూసిన అత్యంత శక్తిమంతమైన గ్యాస్ ఫౌంటెయిన్ ఇదే” అని సైంటిస్టుల బృందానికి నేతృత్వం వహించిన రష్యాలోని టామ్స్ పాలిటెక్నిక్ యూనివర్సిటీ ప్రొఫెసర్ ఇగోర్ సెమిలెటోర్ చెప్పారు. ఇప్పటిదాకా ఇంత శక్తిమంతమైన మీథేన్ గ్యాస్ బుడగలను చూడలేదన్నారు. దాదాపు ఐదు చదరపు మీటర్ల వైశాల్యంలో సముద్రం నుంచి మీథేన్ బుడగలు విడుదలవుతున్నాయని చెప్పారు. ఆ ప్రాంతం నుంచి సైంటిస్టులు శాంపిళ్లను సేకరించారు. ఆ బుడగలు వస్తున్న ప్రాంతంలో విడుదలవుతున్న మీథేన్, ప్రపంచ సగటుకు ఏడు రెట్లు ఎక్కువని అంటున్నా కొందరు మాత్రం 9 రెట్లు ఎక్కువని తేల్చి చెబుతున్నారు. ప్రస్తుతం అక్కడ టెంపరేచర్లు చాలా ఎక్కువగా ఉన్నాయని అంటున్నారు.
పెర్మాఫ్రోస్ట్ బద్దలై..
కొన్ని వేల ఏళ్ల క్రితం ఐస్తో నిండిన ప్రాంతమే పెర్మాఫ్రోస్ట్. నేషనల్ స్నో అండ్ ఐస్ డేటా సెంటర్ ప్రకారం ఉత్తరార్ధగోళంలో 1.4 కోట్ల చదరపు కిలోమీటర్ల మేర పెర్మాఫ్రోస్ట్ విస్తరించి ఉంది. ఆ పెర్మాఫ్రోస్ట్ లోపల మొత్తం కర్బన సమ్మేళనాలు (ఆర్గానిక్ మూలకాలు) నిండి ఉన్నాయి. ఇప్పుడు ఆ పెర్మాఫ్రోస్ట్ కొన్ని చోట్ల బద్దలవుతుండడంతో మీథేన్ వాయువు బయటకు విడుదలవుతోంది. కార్బన్ డయాక్సైడ్తో పోలిస్తే మీథేన్ వాయువులు చాలా శక్తిమంతమైనవి. అందుకే ఇప్పుడు సైబీరియా ప్రాంతంలో వేడి ఎక్కువగా నమోదవుతోందని సైంటిస్టులు చెబుతున్నారు. ఒకవేళ పెర్మాఫ్రోస్ట్లు బద్దలవడం మరింత ఎక్కువైతే మీథేన్ వాయువులు మరింత ఎక్కువగా విడుదలవుతాయని, టెంపరేచర్లు మరింత పెరుగుతాయని ఆందోళన వ్యక్తం చేస్తున్నారు. సైబీరియాలో ఒకప్పుడు ఎక్కువగా ఉన్న పెర్మాఫ్రోస్ట్లు ఇటీవలి కాలంలో కరిగిపోతున్నాయి. కొన్నిచోట్ల పెద్ద పెద్ద గోతులు ఏర్పడుతున్నాయి. 2016లో కొన్ని ప్రాంతాల్లో జెల్ లాగా అక్కడి ప్రాంతం మారిపోవడాన్ని సైంటిస్టులు గుర్తించారు.
