- చెక్పోస్టు, కేబీఆర్ మధ్య 150 మీటర్ల ఇంటర్ చేంజ్ ఏర్పాటు చేస్తాం: ట్రాఫిక్ జాయింట్ సీపీ
హైదరాబాద్ సిటీ, వెలుగు: కేబీఆర్ పార్కు చుట్టూ ట్రాఫిక్ పోలీసులు ఆదివారం రెండోసారి వన్వే ట్రయల్ రన్ చేపట్టారు. ఈ ట్రయల్ రన్ను సీపీ సజ్జనార్, ట్రాఫిక్ జాయింట్ సీపీ జోయల్ డేవిస్ పరిశీలించారు. సజ్జనార్ మాట్లాడుతూ ఏప్రిల్ 5న రెండు గంటల పాటు మొదటి ట్రయల్ రన్ నిర్వహించామని, అప్పుడు గమనించిన లోపాలు పునరావృతం కాకుండా జాగ్రత్తలు తీసుకున్నామన్నారు. ఈ వన్వే వల్ల ప్రయాణ దూరం స్వల్పంగా పెరుగుతుందన్నారు.
రోడ్లపై పెండింగ్లో ఉన్న సివిల్ పనులను త్వరగా ముగించేలా చర్యలు తీసుకుంటున్నట్లు పేర్కొన్నారు. ఈ రూట్లో ఉన్న దవాఖానలతో కో ఆర్డినేషన్చేసుకుంటూ అంబులెన్సుల రాకపోకలకు ఎలాంటి ఇబ్బందులు లేకుండా ఏర్పాట్లు చేస్తామన్నారు. ట్రయల్ రన్ వేళ వాహనాలు లైన్లు మారేప్పుడు కొన్ని ఇబ్బందులు ఎదురైనట్లు గుర్తించామని ట్రాఫిక్ జాయింట్ సీపీ జోయల్ డేవిస్ తెలిపారు.
వాహనాలు సులభంగా లైన్లు మారడానికి వీలుగా చెక్పోస్టు, - కేబీఆర్ పార్కు మధ్య 150 మీటర్ల ఇంటర్ చేంజ్ స్థలాన్ని ఏర్పాటు చేయనున్నట్లు వెల్లడించారు. నడిచేవాళ్లు సురక్షితంగా రోడ్డు దాటేందుకు చెక్పోస్టు, కేబీఆర్ పార్కు వద్ద పెడెస్ట్రియన్ సిగ్నళ్ల ఏర్పాటుపై నిపుణులతో అధ్యయనం చేయిస్తున్నట్లు చెప్పారు. ప్రస్తుతం డ్రోన్ల ద్వారా ఈ జంక్షన్లలో ట్రాఫిక్ విధానాన్ని నిరంతరం పర్యవేక్షిస్తున్నామని వివరించారు. పూర్తిస్థాయిలో సమాచారం సేకరించిన తర్వాతే ఇక్కడ శాశ్వత మార్పులు చేపడతామని స్పష్టం చేశారు. డీసీపీ కాజల్, ఐపీఎస్, జూబ్లీహిల్స్ జోన్ డీసీపీ రమణా రెడ్డి పాల్గొన్నారు.
