- ‘‘ది పెన్న్ బైడెన్ సెంటర్’’లో గుర్తించిన అధికారులు
- వైస్ ప్రెసిడెంట్గా ఉన్నప్పుడే తరలింపు
- దర్యాప్తునకు సహకరిస్తామని ప్రకటించిన వైట్హౌస్
వాషింగ్టన్: అమెరికా ప్రెసిడెంట్గా ఒబామా ఉన్నప్పుడు.. బైడెన్ వైస్ ప్రెసిడెంట్గా ఉన్నారు. ఆ నాటికి సంబంధించిన కొన్ని రహస్య పత్రాలు తాజాగా జో బైడెన్ ప్రైవేట్ ఆఫీస్లో దొరికాయి. ఈ విషయాన్ని వైట్హౌస్ సోమవారం అధికారికంగా ప్రకటించింది. ఈ వ్యవహారంలో ఆర్కైవ్స్ విభాగంతో పాటు డిపార్ట్మెంట్ ఆఫ్ జస్టిస్కు వైట్హౌస్ పూర్తిగా సహకరిస్తుందని బైడెన్ స్పెషల్ కౌన్సిల్ రిచర్డ్ సౌబర్ తెలిపారు. 2022, నవంబర్ 2న వాషింగ్టన్లోని ‘‘ది పెన్న్ బైడెన్ సెంటర్’’లో ఇవి దొరికాయన్నారు. ఈ సెంటర్ను ఖాళీ చేసేందుకు ప్రెసిడెంట్ పర్సనల్ అటార్నీ అక్కడికి వెళ్లారని, ఓ ర్యాక్లోని డాక్యుమెంట్లు ప్యాక్ చేస్తున్న టైంలో ఇవి బయటపడ్డాయని వివరించారు. క్లాసిఫైడ్ మార్కింగ్స్ ఉండటంతో వెంటనే ఆర్కైవ్స్ విభాగంతో పాటు డిపార్ట్మెంట్ ఆఫ్ జస్టిస్కు సమాచారం ఇచ్చామన్నారు. మరుసటి రోజు ఆ రహస్య పత్రాలను వారికి అప్పగించామని తెలిపారు. అప్పటి నుంచి బైడెన్ పర్సనల్ అటార్నీలు ఇన్వెస్టిగేషన్కు పూర్తిగా సహకరిస్తున్నారని వివరించారు. మెక్సికో సిటీలో నిర్వహించిన ఓ సమిట్కు హాజరైన బైడెన్ను.. ఈ రహస్య పత్రాలపై మీడియా ప్రశ్నించగా.. ఆయన సమాధానం చెప్పకుండానే అక్కడి నుంచి వెళ్లిపోయారు. 2017 నుంచి 2020 ప్రెసిడెంట్ ఎలక్షన్స్ క్యాంపెయిన్ స్టార్ట్ అయ్యే ముందు వరకు జో బైడెన్ ‘‘ది పెన్న్బైడెన్ సెంటర్’’లోనే ఉన్నారు.
బైడెన్పై ప్రతిపక్షాల విమర్శలు
ఈ వ్యవహారంపై ప్రతిపక్షాలు ఆగ్రహం వ్యక్తం చేస్తున్నాయి. ప్రధానంగా రిపబ్లికన్ పార్టీ బైడెన్పై విమర్శలు గుప్పిస్తున్నది. ఆ డాక్యుమెంట్ల వివరాలు వెల్లడించాలని సెనేటర్ మార్ష్ బ్లాక్బర్న్ డిమాండ్ చేశారు. బైడెన్ వైస్ ప్రెసిడెంట్గా ఉన్న టైంలో ఆయన ఇంటిపై ఎఫ్బీఐ రెయిడ్ చేసిందని, అప్పుడే వాటిని ప్రైవేట్ ఆఫీస్కు తీసుకెళ్లారని రిపబ్లికన్ కాంగ్రెస్ లీడర్
ట్రాయ్ నెహ్ల్స్ ఆరోపించారు.