సికింద్రాబాద్​ రైల్వేస్టేషన్ నలువైపులా ‘స్కైవాక్​’..మెట్రో, బస్ స్టేషన్ల నుంచి స్టేషన్​లోకి వెళ్లేలా లింక్​ 

• పీపీపీ పద్ధతిలో నిర్మాణానికి హెచ్ఎండీఏ నిర్ణయం
• రూ.30 కోట్లు ఖర్చుఅవుతుందని అంచనా  
• ఆసక్తి గల సంస్థలను ఆహ్వానిస్తూ నోటిఫికేషన్​  

హైదరాబాద్​సిటీ, వెలుగు: రోజూ అత్యంత రద్దీగా ఉండే సికింద్రాబాద్​రైల్వేస్టేషన్​పరిసరాల్లో ట్రాఫిక్​ సమస్యలను పరిష్కరించడంతో పాటు రైల్వేస్టేషన్​కు వెళ్లే ప్రయాణికులకు ఎలాంటి ఇబ్బందుల్లేకుండా స్కై వాక్​ నిర్మించాలని హెచ్ఎండీఏ అధికారులు ప్రతిపాదనలు సిద్ధం చేశారు. ముఖ్యంగా రైల్వే ప్రయాణికులు స్టేషన్​లోపలికి వెళ్లాలంటే ట్రాఫిక్​పద్మవ్యూహాన్ని దాటాల్సిన పరిస్థితి ఏర్పడింది. ఇది ఇలాగే కొనసాగితే భవిష్యత్​లో మరిన్ని ఇబ్బందులు ఎదురయ్యే అవకాశం ఉంది.

ఈ తిప్పలు తప్పించడంతో పాటు మరో 30 ఏండ్ల పాటు ట్రాఫిక్​ సమస్య లేకుండా బస్సు, మెట్రో స్టేషన్ల నుంచి కూడా ప్రయాణికులునేరుగా రైల్వేస్టేషన్​లోకి వెళ్లే విధంగా స్టేషన్​నాలుగు దిక్కులను కలుపుతూ స్కైవాక్​నిర్మించాలని హెచ్​ఎండీఏ ప్రపోజల్స్​రెడీ చేసింది. 

స్టేషన్​లోకి వెళ్లాలంటే కష్టమే..

సికింద్రాబాద్​రైల్వేస్టేషన్​ నుంచి రోజుకు దాదాపు 80 ఎక్స్​ప్రెస్​, మరో 100 ప్యాసింజర్​ రైళ్లు వచ్చి పోతుంటాయి. ఈ రైల్వేస్టేషన్​నుంచి రోజుకు 2 నుంచి 3లక్షల మంది ప్రయాణికులు రాకపోకలు సాగిస్తుంటారు. ఇక పండుగలు, ప్రత్యేక సందర్భాల్లో రోజుకు దాదాపు 3.5లక్షల మంది వరకు వచ్చి పోతుంటారు. ఈ స్టేషన్​అవతల ఉన్న ఆర్టీసీ బస్టాపుల నుంచి దాదాపు వెయ్యి వరకు బస్సులు ప్రయాణికులను తమ గమ్యస్థానాలకు చేరుస్తుంటాయి. వీరంతా రైల్వే స్టేషన్​నుంచి బయటకు రావాలన్నా, లోపలకు వెళ్లాలన్నా సమస్యే ఉంది.

మెట్రోకు సంబంధించి సికింద్రాబాద్​ ఈస్ట్​ మెట్రో రైల్వేస్టేషన్​నుంచి రేతిఫైల్ సెకండ్​ఫ్లోర్​కు మాత్రమే కనెక్టివిటీ ఉంది. వీరు మళ్లీ కిందకు దిగి రైల్వేస్టేషన్​లోకి వెళ్లాల్సి వస్తోంది. దీంతో కొన్ని సందర్భాల్లో రైలు అందుకోవడానికి ఆలస్యమవుతున్నది. ప్రస్తుతం రైల్వేస్టేషన్​లోకి వెళ్లే ప్రయాణికులు ప్లాట్​ఫామ్​ నంబర్​1 నుంచి కానీ10 (బోయగూడ) నుంచి లోపలికి వస్తుంటారు. కానీ, కొన్ని సార్లు టికెట్లు కొనుగోలుచేసి లోపలికి వెళ్లేసరికి రైళ్లు అందుకోలేకపోతుంటారు. ఇలాంటి పరిస్ధితిని నివారించడానికి హెచ్ఎండీఏ అధికారులు రైల్వేస్టేషన్​ను అనుసంధానిస్తూ స్కైవాక్​నిర్మించాలని ప్రతిపాదించారు. 

800 మీటర్ల పరిధిలో...

ప్రస్తుతం నగరంలో అత్యంత రద్దీగా ఉండే ఉప్పల్​చౌరస్తాలో హెచ్ఎండీఏ నిర్మించిన స్కైవాక్​మంచి ఫలితాలను ఇస్తోందని అధికారులు చెప్తున్నారు. స్కైవాక్​ నిర్మాణం తర్వాత ఇక్కడ ట్రాఫిక్​ ఇబ్బందులు చాలా వరకు తగ్గాయంటున్నారు. అలాగే, మెహదీపట్నం చౌరస్తాలోనూ హెచ్ఎండీఏ నిర్మిస్తున్న స్కైవాక్​ తుదిదశకు చేరుకుంది. దీన్ని త్వరలో ప్రారంభించనున్నారు. దీంతో సికింద్రాబాద్​ రైల్వేస్టేషన్​సెంటర్​లోనూ స్కైవాక్​ నిర్మిస్తే చాలా వరకు ట్రాఫిక్​ఇబ్బందులు తగ్గుతాయని భావిస్తున్నారు. స్టేషన్​నుంచి 800 మీటర్ల పరిధిలో ఈ స్కైవాక్​నిర్మించే ప్లాన్​లో ఉన్నారు. దీనికి దాదాపు రూ. 35 కోట్లు ఖర్చు కాగలవని అంచనా వేస్తున్నారు. 

ఆహ్లాదకరంగా కూడా..

కేవలం రైలు ప్రయాణికులే కాకుండా సమీప ప్రాంతాల్లోని ప్రజలు, ఇతర ప్రాంతాల నుంచి రాకపోకలు సాగించే వారు కూడా ఈ స్కైవాక్​ ఉపయోగించుకునేలా నిర్మిస్తున్నారు. స్కైవాక్​ పైన సందర్శకులు కూర్చునేందుకు కూడా ఏర్పాట్లు చేస్తారు. ప్రైవేట్​భాగస్వామ్యంతో నిర్మిస్తున్న కారణంగా ప్రైవేట్​సంస్థలకు స్కైవాక్​పై కాఫీషాప్​లు, ఫుడ్​కోర్టులు, షాపింగ్​వంటివి ఏర్పాటు చేసుకోవడానికి అవకాశం ఇస్తారు. దీంతో షాపింగ్​చేసేందుకు కూడా అవకాశం ఉంటుందని అధికారులు చెప్తున్నారు. సాయంత్రం వేళల్లో, సెలవుదినాల్లో ఫ్యామిలీతో కలిసి కూడా స్కైవాక్​పై ఎంజాయ్​ చేయొచ్చంటున్నారు. ప్రస్తుతం రైల్వేస్టేషన్​ఆధునీకరణ పనులు జరుగుతున్న  నేపథ్యంలో ఈ పనులు పూర్తయ్యేలోపు స్కైవాక్​ పనులు కూడా ప్రారంభించాలని హెచ్ఎండీఏ భావిస్తోంది.

ఏ వైపు నుంచి వచ్చినా డైరెక్ట్ స్టేషన్​లోకే..

రైల్వేస్టేషన్​కు నాలుగు వైపులా అంటే ఈస్ట్​ వైపున ఇప్పటికే రేతిఫైల్​బస్​స్టేషన్​కు ఈస్ట్​మెట్రోస్టేషన్​కు కనెక్టివిటీ ఉంది. అలాగే, ముషీరాబాద్​వైపు నుంచి, ఉత్తరాన క్లాక్​టవర్​ప్రాంతం నుంచి, వెస్ట్​సైడ్​మోండా మార్కెట్​వైపు నుంచి, సౌత్​సైడ్​బోయిగూడ ప్రాంతాలను కలుపుతూ నేరుగా రైల్వేస్టేషన్​లోకి వెళ్లేలా ఈ స్కైవాక్​ నిర్మించనున్నారు. అంటే ఆయా ప్రాంతాల నుంచి వచ్చే రైలు ప్రయాణికులు నేరుగాస్కైవాక్​ద్వారా రైల్వేస్టేషన్​లోకి ప్రవేశించేందుకు అవకాశం ఉంటుంది. నాలుగు వైపుల నుంచి బస్​స్టేషన్లకు, మెట్రోకు అనుసంధానం చేస్తూ ఈ స్కైవాక్​ఉంటుంది. రైల్వేస్టేషన్​బయట కూడా పాదచారులకు ఏ ఇబ్బంది లేకుండా స్కైవాక్​ద్వారా వెళ్లే ఛాన్స్​ఉంటుంది.