పెద్దమందడి, వెలుగు : పోలీసుల తనిఖీల్లో భారీగా నగదు, లిక్కర్ పట్టుబడుతోంది. మంగళవారం హైవే 44పై వెల్టూర్ గ్రామం వద్ద ఏర్పాటు చేసిన చెక్ పోస్ట్లో కారులో తరలిస్తున్న రూ.26.50 లక్షలను పోలీసులు స్వాధీనం చేసుకున్నారు. పశ్చిమ బెంగాల్ కు చెందిన రాజేశ్ పడ్డర్ కర్నూల్ నుంచి హైదరాబాద్ కు వెళ్తుండగా డబ్బు పట్టుకున్నట్లు కొత్తకోట సీఐ శ్రీనివాస్ రెడ్డి తెలిపారు. తనిఖీల్లో అబ్జర్వర్ జయశంకర్, ఎస్ఐ హరిప్రసాద్ పాల్గొన్నారు.
ఆమనగల్లు : పట్టణంలోని బస్టాండ్ లో అనుమానాస్పదంగా తిరుగుతున్న కడ్తాల్ మండలం రావిచేడు గ్రామానికి చెందిన చేగూరు మహేశ్ వద్ద రూ.5 లక్షల నగదు స్వాధీనం చేసుకున్నట్లు ఎస్ఐ బలరాం నాయక్ చెప్పారు. పెట్రోలింగ్ కానిస్టేబుళ్లు మహేశ్ను తనిఖీ చేసినట్లు చెప్పారు.
బెల్ట్ షాపులపై దాడి..
చిన్నచింతకుంట : మండలంలోని మద్దూరు గ్రామంలో బెల్ట్షాపులపై ఎస్ఐ ఆర్.శేఖర్ఆధ్వర్యంలో దాడులు చేశారు. గ్రామానికి చెందిన మహమ్మద్ కిరాణ షాపులో 12 లిక్కర్ బాటిళ్లు, రాజుగౌడ్ షాపులో 32 బీర్లు, 30 క్వార్టర్బాటిళ్లుస్వాధీనం చేసుకుని కేసు నమోదు చేసినట్లు ఎస్ఐ చెప్పారు.
అలంపూర్ : ఉండవెల్లి మండలం బసాపురం గ్రామంలో బెల్ట్ షాపులపై పోలీసులు దాడులు నిర్వహించారు. శ్రీనివాసులు దగ్గర 24 బీర్లు, 5 క్వార్టర్ బాటిళ్లు, మద్దిలేటి దగ్గర 9 బీర్లు, 7 క్వార్టర్ బాటిళ్లను స్వాధీనం చేసుకొని కేసు నమోదు చేసి దర్యాప్తు చేస్తున్నట్లు ఎస్ఐ బాలరాజు తెలిపారు.
