దుబాయ్: ఆసియా కప్ ముగిసి దాదాపు నెల కావొస్తున్నా.. టైటిల్ వివాదం ఇంకా కొనసాగుతూనే ఉంది. 2025 ఆసియా కప్ విజేతగా ఇండియా నిలిచిన విషయం తెలిసిందే. 2025, సెప్టెంబర్ 28న దుబాయ్ వేదికగా జరిగిన ఫైనల్లో చిరకాల ప్రత్యర్థి పాకిస్తాన్ను చిత్తు చేసి టీమిండియా విజేతగా అవతరించింది. అయితే.. పహల్గాం ఉగ్రదాడి నిరసనగా ఆసియా క్రికెట్ కౌన్సిల్ (ఏసీసీ) చైర్మన్గా ఉన్న పాకిస్తాన్ మంత్రి మోహ్సిన్ నఖ్వీ చేతుల మీదుగా ట్రోఫీ తీసుకునేందుకు ఇండియా నిరాకరించింది.
టోర్నీ విజేతగా నిలిచినప్పటికీ ఒట్టి చేతులోనే దుబాయ్ నుంచి టీమిండియా ప్లేయర్స్ ఇండియా తిరిగొచ్చారు. దీంతో ఆసియా కప్ టైటిల్ను తన వెంటే తీసుకెళ్లారు మోహ్సిన్ నఖ్వీ. ఈ క్రమంలో ఆసియా కప్ 2025 ట్రోఫీని వెంటనే భారత క్రికెట్ జట్టుకు అందించాలని డిమాండ్ చేస్తూ బీసీసీఐ తాజాగా ఏసీసీ చీఫ్ మోహ్సిన్ నఖ్వీకి అధికారికంగా లేఖ రాసింది.
ఇండియాకు టైటిల్ ఇవ్వకపోతే తీవ్ర పరిణామాలు ఎదుర్కొవాల్సి ఉంటుందని హెచ్చరించింది. ఈ క్రమంలో బీసీసీఐ లేఖపై మోహ్సిన్ నఖ్వీ అంతే ఘాటుగా స్పందించాడు. ఆసియా కప్ ట్రోఫీని భారతదేశానికి అప్పగించడం కుదరదని తేల్చి చెప్పాడు. సరిహద్దులు దాటి ట్రోఫీని పంపాలని ఆశించొద్దని బీసీసీఐకి కౌంటర్ ఇచ్చాడు. ట్రోఫీని ఇండియాకు పంపేది లేదని కుండబద్దలు కొట్టాడు.
►ALSO READ | IND vs AUS: అది అత్యంత చెత్త నిర్ణయం.. రాహుల్‌ను నాలుగో స్థానంలో ఆడించండి: టీమిండియా మాజీ బ్యాటర్
ఒకవేళ బీసీసీఐ ట్రోఫీ కావాలనుకుంటే.. ఇండియాలో ఒక ప్రజెంటేషన్ వేడుకను నిర్వహించి.. ఆ వేడుకలో తన చేతుల మీదుగా ఆసియా కప్ టైటిల్ తీసుకోవడానికి ఒక టీమిండియా ప్లేయర్ను పంపాలని బీసీసీఐకి సూచించాడు మోహ్సిన్ నఖ్వీ. ఇప్పటికే నఖ్వీ తీరుపై పీకలదాకా కోపంతో ఉన్నా బీసీసీఐ.. తాజా రిప్లైపై ఎలాంటి నిర్ణయం తీసుకుంటుందో చూడాలి. ఈ వివాదం చిలికి చిలికి ఐసీసీ వద్దకు చేరేలా కనిపిస్తోంది.
