బషీర్బాగ్, వెలుగు: రజాకార్ సినిమాకు రాష్ట్ర ప్రభుత్వం గద్దర్ అవార్డు ఇవ్వడమేంటని పలువురు వక్తలు ప్రశ్నించారు. బషీర్ బాగ్ ప్రెస్ క్లబ్లో గురువారం అసోసియేషన్ ఫర్ ప్రొటెక్షన్ ఆఫ్ సివిల్ రైట్స్(ఏపీసీఆర్) ఆధ్వర్యంలో సమావేశం నిర్వహించారు. వీక్షణం సంపాదకులు వేణుగోపాల్ మాట్లాడుతూ.. రజాకార్ సినిమా తెలంగాణ చరిత్ర, సంస్కృతిని వక్రీకరించిందని, ఆర్ఎస్ఎస్ అజెండాను ప్రోత్సహించిందన్నారు. ఈ సినిమాకు అవార్డు ఇచ్చి, తెలంగాణ చరిత్రను అవమానపరిచారని వ్యాఖ్యానించారు.
అవార్డును వెనక్కి తీసుకోవాలని, లేదంటే సుప్రీంకోర్టును ఆశ్రయిస్తామన్నారు. రైతు స్వరాజ్య వేదిక ప్రతినిధి కన్నెగంటి రవి మాట్లాడుతూ.. తెలంగాణ వాస్తవ చరిత్రను ఈ సినిమాలో చూపించలేదన్నారు. సీఎం రేవంత్ రెడ్డి ఆర్ఎస్ఎస్ కార్యకర్తగా వ్యవహరిస్తున్నారని ఆరోపించారు. గోషాల నిర్మాణానికి దళితుల భూములను స్వాధీనం చేసుకోవడం ఏంటని ప్రశ్నించారు. పసునూరి రవీందర్, స్కైబాబా, అవరీచ్ బాణీ, అన్వర్ ఖాన్ పాల్గొన్నారు.
