లైఫ్లోప్రతి విషయం షేర్ చేసుకునే రోజులివి. ఫేస్బుక్, వాట్సాప్, ఇన్స్టా, ట్విటర్.. సోషల్ మీడియాలో లేనివాళ్లు లేరు. ఇవేమీ లేని రోజుల్లో ఎట్లా ఉండేవారో అనుకుంటూ మీమ్స్ చూస్తూ ఎంజాయ్ చేస్తుంటాం. కానీ సోషల్ మీడియా 50 వేల ఏండ్ల క్రితమే ఉందంటే నమ్మగలమా...
ఇన్ఫర్మేషన్ షేర్ చేసుకోవడానికి ప్రతి కాలంలోనూ ఏదో ఒక మీడియా ఉండేది. రాజుల శిలాఫలకాలు, శాసనాలు ఇలాంటివే. ఇవి హిస్టరీని షేర్ చేసేవి. ప్రింట్, డిజిటల్ మీడియా వచ్చాక ఇన్ఫర్మేషన్ పంచుకునే వేగం పెరిగింది. ఇటీవల ఆఫ్రికాలోని ఆర్కియాలజిస్ట్ల రీసెర్చ్ నమ్మలేని ఓ నిజాన్ని వెల్లడించింది.
పదేళ్ల పరిశోధన
ఆఫ్రికన్ ఆర్కియాలజిస్ట్ల అన్వేషణలో 1,500 పూసలు దొరికాయి. వాటిని పదేళ్ల పాటు రీసెర్చ్ చేశారు. అవన్నీ ఆస్ట్రిచ్ ఎగ్ షెల్స్తో చేసిన పూసలు. చివరికి ఆ పూసలన్నీ ఒక రకమైన సోషల్ నెట్వర్క్ను ప్రెజెంట్ చేసేందుకు వాడినవని చెప్పారు. డోనట్ ఆకారంలో ఉండే పూసలు సాధారణ అలంకారాల్లో, సంప్రదాయానికి ప్రతీకగా వాడారు. సదరన్ ఆఫ్రికాలో ఇప్పటికీ కొన్ని తెగలవాళ్లు ఈ టైప్ పూసలు వాడుతున్నారు.
పూసల ఊసులు
పూసలను తయారు చేశాక వాటి మీద సింబాలిక్ మెసేజ్లు చెక్కేవారు. అవి సందర్భానికి తగ్గట్టుగా ఉండేవి. ఇప్పుడు వెడ్డింగ్ రింగ్ మీద పేర్లు రాస్తున్నారు కదా. ఆ పూసల రాతలు కూడా అలాంటివే. అలా పూసలు దండగుచ్చి షేర్ చేసుకునేవాళ్లని చెప్పారు ఆర్కియాలజీ రీసెర్చర్ జెనిఫర్ మిల్లర్. ఈ పరిశోధన కోసం తూర్పు, దక్షిణ ఆఫ్రికాల్లోని 31 ప్రాంతాల్లో అన్వేషించి పూసలు సేకరించారు. ఇవన్నీ సుమారు 50 వేల ఏండ్లనాటివని తేల్చారు. పూసల మందం, ఆకారం, కొలతలు వంటివి విభజించుకుంటూ ఏ ప్రాంతం వాళ్లు ఎలాంటి పూసలు వాడారో తెలుసుకున్నారు. ఈ 31 ప్రాంతాలూ 3000 కి.మీ. పరిధిలో ఉన్నా.. కొన్ని కొన్ని పూసలు ఒకే రకమైనవి తయారు చేసుకున్నారు. అంటే.. ఒక విషయం అందరికీ ఒకేలా షేర్ అయినట్టే కదా.
అప్డేట్ అయ్యారు
అతి పురాతన పూస తూర్పు ఆఫ్రికాలో దొరికింది. అంటే.. అక్కడి నుంచి ఆఫ్రికా మొత్తానికి నెట్ వర్క్ మొదలైందని చెప్పొచ్చు. శిలాయుగానికి ఇదొక స్టయిలిస్టిక్ కనెక్షన్ అని చెప్తారు రీసెర్చర్స్. అయితే 33,000 ఏండ్ల కిందట ఈ కనెక్షన్ బ్రేక్ అయింది. ఈస్ట్ ఆఫ్రికాలో మాత్రం కొంత కాలం ఈ స్టయిల్ కంటిన్యూ అయింది. మరికొన్ని శతాబ్దాల తర్వాత పూసల స్టయిల్, కలర్స్ అన్నీ బాగా మారాయి. నాగరికతలో మార్పు ఈ దండల్లోనూ కనిపించేది. దక్షిణ భాగంలో కొన్ని ప్రాంతాల్లో విపత్తుల తర్వాత ఈ కళ గాడి తప్పినట్టు ఉంది. సంప్రదాయాల కొనసాగింపు సడెన్గా ఆగిపోవడం, పూసల తయారీ టెక్నిక్ సరిగ్గా తెలియకపోవడం వంటి కారణాల వల్ల కొన్ని ప్రాంతాల్లో ఈ ట్రెండ్ ఆగిపోయింది.
