ఇన్సూరెన్స్ పైసల కోసం.. బొమ్మను మనిషిగా నమ్మించి అంత్యక్రియలు!

• అప్పులు తీర్చడానికి అడ్డదారులు తొక్కిన యూపీ వాసి
• వేరే వ్యక్తి పేరిట బీమా పాలసీ కొని.. అతడు చనిపోయాడని నమ్మించేందుకు ప్రయత్నం 
• పోలీసులకు చిక్కడంతో స్కామ్ వెలుగులోకి

లక్నో: ఉత్తరప్రదేశ్‌‌‌‌‌‌‌‌ కు చెందిన ఓ వ్యక్తి బీమా సొమ్ము కోసం బొమ్మకు ఫేక్‌‌‌‌‌‌‌‌ అంత్యక్రియలు చేయడానికి ప్రయత్నించారు. చివరకు పోలీసులకు చిక్కడంతో ఈ స్కామ్ వెలుగులోకి వచ్చింది. యూపీలోని గ్రహ్‌‌‌‌‌‌‌‌ ముక్తేశ్వర్‌‌‌‌‌‌‌‌ గంగా ఘాట్‌‌‌‌‌‌‌‌ లో ఈ ఘటన జరిగింది. హర్యానాలో రిజిస్టర్ చేసిన ఐ20 కారులో నలుగురు వ్యక్తులు బుధవారం అంత్యక్రియలు చేయడానికి ఘాట్ కు ఓ శవాన్ని తీసుకొచ్చారు. 

ఆచారాలు పాటించకుండా నేరుగా శవాన్ని చితిపైకి తీసుకెళ్లి దహన సంస్కారాలకు ప్రయత్నించారు. స్థానికులకు అనుమానం రావడంతో నిలదీశారు. శవంపై వస్త్రాన్ని తొలగించగా ప్లాస్టిక్‌‌‌‌‌‌‌‌ బొమ్మ కనిపించింది. నాటకం బయటపడేసరికి పారిపోవడానికి ప్రయత్నించారు.  ఇద్దరిని స్థానికులు పట్టుకొని పోలీసులకు అప్పగించగా.. మరో ఇద్దరు పారిపోయారు. 

ఢిల్లీ ఆసుపత్రి సిబ్బంది  అసలు శవానికి బదులుగా డమ్మీ డెడ్ బాడీని ఇచ్చినట్టు వారు మరో కథ కూడా అల్లారు. కానీ పోలీసులు తమ స్టైల్ లో విచారించడంతో అసలు విషయం వెలుగులోకి వచ్చింది. 

చనిపోయాడని నమ్మించడానికి ప్లాన్..  

ఢిల్లీలోని కైలాస్  పురికి చెందిన కమల్‌‌‌‌‌‌‌‌ సోమానీ రూ.50 లక్షలకు పైగా అప్పులు చేశాడు. అప్పులను తప్పించుకోవడానికి  తన ఫ్రెండ్ ఆశిష్ ఖురానాతో కలిసి పథకం వేశాడు. గతంలో తనవద్ద పని చేసిన అన్షుల్ కుమార్ ఆధార్, పాన్ కార్డు తీసుకుని, ఏడాది క్రితం అన్షుల్ పేరిట రూ.50 లక్షల జీవిత బీమా పాలసీ  కొని,  ప్రీమియంలు చెల్లించాడు. 

ఇప్పుడు అన్షుల్ మరణించాడని నకిలీ డెత్ సర్టిఫికెట్ పొందాడు. తర్వాత శవాన్ని దహనం చేస్తున్నట్టుగా  నమ్మించడానికి ప్రయత్నించి, దొరికిపోయాడు. అన్షుల్‌‌‌‌‌‌‌‌.. ప్రయాగ్ రాజ్ లో ఉన్నట్టు పోలీసులు గుర్తించారు. తన పేరు మీద బీమా పాలసీ ఉన్న విషయం తెలియదని అతడు చెప్పాడు. దీంతో పోలీసులు కమల్‌‌‌‌‌‌‌‌ సోమానీని, అతడి స్నేహితుడిని అరెస్టు చేశారు. మిగతా ఇద్దరి కోసం గాలిస్తున్నారు.