- ఎక్కువ సేపు క్యూలైన్లో నిల్చొలేక గర్భిణుల అవస్థలు
- అదనంగా డాక్టర్లను నియమించాల్సి ఉన్నా పట్టించుకోని ప్రభుత్వం
మాదాపూర్, వెలుగు: కొండాపూర్ ఏరియా ఆస్పత్రిలో గైనకాలజిస్ట్లు సరిపడా లేక గర్భిణులు ఇబ్బందులు పడుతున్నారు. డాక్టర్ను కలవాలంటే గంటల పాటు వెయిట్ చేయాల్సిన పరిస్థితి. వందల సంఖ్యలో ఔట్ పేషెంట్లు(ఓపీ) వస్తున్నా.. గైనకాలజిస్టుల సంఖ్య సింగిల్ డిజిట్ ఉంది. డాక్టర్లు తక్కువగా ఉండటంతో చెకప్ కోసం వచ్చే గర్భిణులు గంటల తరబడి క్యూ లైన్లో నిలుచోవాల్సిన పరిస్థితులు ఏర్పడుతున్నాయి. డాక్టర్లు, హెల్త్ స్టాఫ్ తక్కువగా ఉండటంతో వారిపై ఒత్తిడి పెరిగి ఒక్కోసారి సహనం కోల్పోయి పేషెంట్లపై చిరాకు పడుతున్నారు. క్యూ లైన్లో నిల్చోలేక కొందరు గర్భిణులు ప్రైవేట్ హాస్పిటల్స్కు వెళుతున్నారు.
రోజూ 450- 600 మంది
రంగారెడ్డి జిల్లాలోనే కొండాపూర్ ఏరియా ఆస్పత్రి పెద్దది. కూకట్పల్లి, కేపీహెచ్బీ కాలనీ, అల్విన్కాలనీ, చందానగర్, మియాపూర్, లింగంపల్లి, మాదాపూర్, కొండాపూర్, గచ్చిబౌలి, తెల్లాపూర్, మణికొండ, రాయదుర్గం, వట్టినాగులపల్లి, గండిపేట నుంచి ఇక్కడికి ఎక్కువగా పేషెంట్లు వస్తుంటారు. రోజూ 450–600 మంది గర్భిణులు జనరల్ చెకప్కు వస్తుంటారు. 20–30 వరకు డెలివరీలు జరుగుతాయి. వీరితో పాటు దాదాపు 400 మంది జనరల్, ఇతర విభాగాల్లో ఓపీ కోసం వస్తుంటారు. రోజూ వందల సంఖ్యలో గర్భిణులు వస్తున్నప్పటికీ 8 మంది మాత్రమే గైనకాలజిస్ట్లు ఉన్నారు. మొత్తం 9 మంది ఉండగా, వీరిలో ఒకరు డిప్యూటేషన్మీద ఇబ్రహీంపట్నంకు వెళ్లారు. ఓపీ చెకప్చేసేందుకు ముగ్గురు లేదా నలుగురు గైనకాలజిస్ట్లు మాత్రమే అందుబాటులో ఉంటున్నారు. దీంతో చెకప్ చేసేందుకే చాలా టైమ్ పడుతోంది. డాక్టర్ను కలిసేందుకు దాదాపు 3 గంటల వరకు వెయిట్ చేయాల్సి వస్తోందని గర్భిణులు వాపోతున్నారు.
అదనపు డాక్టర్ల కేటాయింపులో నిర్లక్ష్యం
8 మంది గైనకాలజిస్టుల్లోనలుగురు ప్రతి రోజు ఉదయం నుంచి మధ్యాహ్నం వరకు ఓపీ చెక్చేస్తున్నారు. మిగిలిన వారు మెటర్నిటీ వార్డు, డెలివరీ సెక్షన్లో ఉంటారు. వీరి సంఖ్యను మరింత పెంచాల్సిన అవసరం ఉన్నా ప్రభుత్వం పట్టించుకోవడం లేదు. పెద్ద సంఖ్యలో గర్భిణులు ఏరియా ఆసుపత్రికి వస్తున్నా అదనపు డాక్టర్లను నియమించడంలో ప్రభుత్వం విఫలమవుతోంది. ప్రస్తుతం ఉన్న డాక్టర్లపైనే ఎక్కువ ప్రెజర్పడుతోంది.
3 గంటల పాటు వెయిటింగ్..
ప్రతి నెలా హెల్త్ చెకప్ కోసం కొండాపూర్లోని జిల్లా ఆస్పత్రికి వస్తాను. ఉదయం 8 గంటలకే వచ్చి ఓపీ తీసుకొని క్యూలైన్లో వెయిట్ చేస్తాను. అప్పటికే చాలామంది ఉంటారు. చెకప్ కోసం క్యూలైన్లో దాదాపు 3 గంటల సేపు వెయిట్ చేయాల్సి వస్తోంది. ఆ తర్వాత స్కానింగ్ ఇతర టెస్టుల కోసం మరో గంట టైం పడుతోంది.
- హరిత, గర్భిణి, గండిపేట
