IND vs NZ 4th ODI: న్యూజిలాండ్ పర్యటనలో ఉన్న టీమిండియా రేపు (2026, నవంబర్ 13, శుక్రవారం) మౌంట్ మౌంగనుయ్ వేదికగా జరగనున్న నాలుగో వన్డేలో ఆతిథ్య జట్టుతో అమీతుమీ తేల్చుకోనుంది. ఐదు మ్యాచ్‌ల సిరీస్‌లో ఇప్పటికే 2–0 ఆధిక్యంలో ఉన్న భారత్, ఈ మ్యాచ్ గెలిస్తే మరో మ్యాచ్ మిగిలి ఉండగానే సిరీస్‌ను కైవసం చేసుకుంటుంది. మరోవైపు, ఏడేళ్ల తర్వాత సొంతగడ్డపై వన్డే సిరీస్ ఓడిపోయే ప్రమాదంలో ఉన్న కివీస్ కు ఇది చావోరేవో పోరు.
శ్రేయస్ అయ్యర్‌కు బ్యాటింగ్, కెప్టెన్సీ సవాల్:
నవంబర్ 19వ తేదీ నుంచి ప్రారంభం కానున్న టెస్టు సిరీస్ సన్నాహాల కోసం శుభ్‌మన్ గిల్, కేఎల్ రాహుల్, అన్షుల్ కాంబోజ్ వెల్లింగ్టన్‌కు వెళ్లిపోయారు. దీంతో వైస్ కెప్టెన్ శ్రేయస్ అయ్యర్ తొలిసారి భారత వన్డే జట్టు పగ్గాలు చేపట్టనున్నాడు. అయితే, ఈ సిరీస్‌లో షార్ట్ బాల్స్ ఆడటంలో ఇబ్బంది పడుతున్న అయ్యర్, కెప్టెన్సీ ఒత్తిడిని తట్టుకుని బ్యాట్‌తోనూ సమాధానం చెప్పాల్సి ఉంది.
రోహిత్ ఫామ్.. ఇషాన్, రుతురాజ్‌లకు గోల్డెన్ ఛాన్స్:
ఓపెనింగ్, కీపింగ్: తొలి రెండు మ్యాచ్‌ల్లో (0, 23) విఫలమైన సీనియర్ ఓపెనర్ రోహిత్ శర్మ భారీ ఇన్నింగ్స్‌పై కన్నేశాడు. గిల్ గైర్హాజరీలో రోహిత్‌కు జోడీగా ఇషాన్ కిషన్ ఓపెనింగ్ చేయడంతో పాటు వికెట్ కీపింగ్ బాధ్యతలు నిర్వర్తించనున్నాడు. నాలుగేళ్ల క్రితం ఓపెనర్‌గా డబుల్ సెంచరీ చేసిన ఇషాన్‌కు ఇది కీలక అవకాశం.
మిడిలార్డర్, పేస్: గత నాలుగు వన్డే ఇన్నింగ్స్‌ల్లో ఒక సెంచరీ, ఒక హాఫ్ సెంచరీ చేసిన రుతురాజ్ గైక్వాడ్ మిడిలార్డర్‌లో తన స్థానాన్ని సుస్థిరం చేసుకోవాలని చూస్తున్నాడు. బౌలింగ్‌లో ఫామ్‌లో ఉన్న కాంబోజ్ స్థానంలో సీనియర్ పేసర్ మహమ్మద్ సిరాజ్ తుది జట్టులోకి రానున్నాడు. గత వారం ఇండియా-ఎ తరఫున 4 వికెట్లు తీసిన సిరాజ్, ఈ సిరీస్‌లో తొలిసారి బంతిని అందుకోనున్నాడు. ఆకిబ్ నబీ, అర్ష్‌దీప్ సింగ్ తమ స్థానాలను నిలబెట్టుకునే ఛాన్స్ ఉంది.
మార్పులతో బరిలోకి న్యూజిలాండ్:
టెస్టు సిరీస్ కోసం టామ్ లాథమ్, డారిల్ మిచెల్, గ్లెన్ ఫిలిప్స్, నాథన్ స్మిత్, హెన్రీ నికోల్స్ జట్టును వీడటంతో కివీస్ కూడా భారీ మార్పులతో బరిలోకి దిగుతోంది. సగం మంది సపోర్ట్ స్టాఫ్ కూడా టెస్టు జట్టుతో కలిశారు. దేశవాళీ క్రికెట్‌లో నిలకడగా రాణిస్తున్న అన్‌క్యాప్డ్ ప్లేయర్ బ్రెట్ రాండెల్‌ను న్యూజిలాండ్ జట్టులోకి తీసుకుంది. వన్డే జట్టులో స్థానం కోసం పోరాడుతున్న వికెట్ కీపర్ టిమ్ సీఫెర్ట్‌పై ఒత్తిడి నెలకొంది.
మ్యాచ్ వివరాలు:
సమయం: శుక్రవారం (నవంబర్ 13), ఉదయం 7:30 గంటలకు (IST) ప్రారంభం.
వేదిక: బే ఓవల్, మౌంట్ మౌంగనుయ్.
ఇరు జట్ల అంచనా:
భారత జట్టు: రోహిత్ శర్మ, ఇషాన్ కిషన్ (వికెట్ కీపర్), విరాట్ కోహ్లీ, రుతురాజ్ గైక్వాడ్, శ్రేయస్ అయ్యర్ (కెప్టెన్), అక్షర్ పటేల్, నమన్ ధీర్, ఆకిబ్ నబీ, గుర్నూర్ బ్రార్, అర్ష్‌దీప్ సింగ్,మహమ్మద్ సిరాజ్
న్యూజిలాండ్ జట్టు: టిమ్ సీఫెర్ట్ (వికెట్ కీపర్), విల్ యంగ్, మైఖేల్ బ్రేస్‌వెల్, క్రిస్టియన్ క్లార్క్, డీన్ ఫాక్స్‌క్రాఫ్ట్, కైల్ జేమీసన్, మిచెల్ శాంట్నర్ (కెప్టెన్), జాకబ్ డఫీ, మాట్ ఫిషర్, నిక్ కెల్లీ, బ్రెట్ రాండెల్
