సెప్టెంబర్ క్వార్టర్లో కంపెనీలకు కాసుల పంట.. 400 సంస్థల లాభాలు జూమ్

సెప్టెంబర్ క్వార్టర్లో కంపెనీలకు కాసుల పంట.. 400 సంస్థల లాభాలు జూమ్

న్యూఢిల్లీ: ఈసారి కార్పొరేట్ రంగం అదరగొట్టింది. దేశంలోని ప్రధాన కంపెనీల ఖాతాల్లోకి భారీగా లాభాలు వచ్చి చేరాయి. గత 4 ఏళ్లకు పైగా కాలంలో ఎన్నడూ లేనంత వేగంగా కంపెనీల లాభం పెరిగింది. 2026 సెప్టెంబర్ క్వార్టర్‌‌‌‌లో భారత కంపెనీల లాభాలకు అదనంగా చేరిన మొత్తం సుమారు రూ.1.1 లక్షల కోట్లు. ఇందులో నిఫ్టీ-50 కంపెనీల లాభాల వృద్ధి 27 శాతంగా నమోదైంది.

ఇది గత 17 క్వార్టర్లలో అత్యధికం. 2025 సెప్టెంబర్ క్వార్టర్లో మనదేశంలోని 400 కంపెనీల లాభం రూ.3.44 లక్షల కోట్లు కాగా,  2026 సెప్టెంబర్ క్వార్టర్ లాభం రూ.4.53 లక్షల కోట్లకు చేరింది. అంటే దాదాపు రూ.1.11  లక్షల కోట్లు పెరిగింది.  కంపెనీల రెవెన్యూ కూడా 22శాతం నుంచి 24.6శాతం వరకు వృద్ధి చెంది. 

ముఖ్యంగా బ్యాంకింగ్, ఫైనాన్షియల్ సర్వీసెస్, మెటల్స్, ఆయిల్ అండ్ గ్యాస్ రంగాల్లోని కంపెనీలు మెరుగైన పనితీరు కనబరిచినట్లు తెలుస్తోంది. బ్యాంకింగ్ రంగంలో రుణాల పంపిణీ పెరగడం, వడ్డీ ఆదాయం మెరుగుపడటం బ్యాంకుల లాభాలకు తోడ్పడ్డాయి. మెటల్స్ రంగంలో అంతర్జాతీయ మార్కెట్ పరిస్థితులు, డిమాండ్‌‌‌‌లో మార్పులు కొన్ని కంపెనీలకు అనుకూలంగా మారాయి. ఆయిల్, గ్యాస్ రంగంలోనూ వ్యాపార కార్యకలాపాలు కంపెనీల ఆదాయాలపై ప్రభావం చూపాయి.

కొన్ని రంగాల్లో మందగమనం

అన్ని రంగాల్లోనూ ఇదే పరిస్థితి లేదు. కన్జూమర్, సిమెంట్, కెమికల్ రంగాల్లోని కొన్ని కంపెనీలు ముడిసరుకు ధరలు, రవాణా ఖర్చులు, ఎనర్జీ ఖర్చుల పెరుగుదలతో ఇబ్బందులు ఎదుర్కొంటున్నాయి. దీనివల్ల కంపెనీల మార్జిన్లపై ఒత్తిడి పడుతోంది. అమ్మకాలు పెరిగినా, ఖర్చులు అదుపులో లేకపోతే  లాభాలు ఆశించిన స్థాయిలో పెరగకపోవచ్చు. కంపెనీల లాభాల్లో ఈ స్థాయి వృద్ధి స్టాక్ మార్కెట్‌‌‌‌కు సానుకూల సంకేతంగా భావించవచ్చు. లాభాలు పెరిగాయనే కారణంతో అన్ని షేర్ల ధరలు పెరుగుతాయని చెప్పలేమని ఎనలిస్టులు అంటున్నారు.  భవిష్యత్తు వ్యాపార అంచనాలు, అప్పుల భారం, మార్జిన్లు, షేరు ధర వంటి అంశాలను కూడా పరిశీలించాలి.