- కారు దిగనున్న కోనప్ప
- ఈనెల 14న కాంగ్రెస్ పార్టీలోకి సిర్పూర్ మాజీ ఎమ్మెల్యే
- సోదరుడు, జడ్పీ చైర్మన్ కోనేరు కృష్ణా రావుతో కలిసి చేరిక
- సిర్పూర్లో ఖాళీ కానున్న బీఆర్ఎస్
ఆసిఫాబాద్ / కాగజ్ నగర్, వెలుగు: కుమ్రం భీం ఆసిఫాబాద్ జిల్లా సిర్పూర్ మాజీ ఎమ్మెల్యే, బీఆర్ఎస్ జిల్లా అధ్యక్షుడు కోనేరు కోనప్ప కాంగ్రెస్లో చేరనున్నారు. బీఆర్ఎస్ పార్టీకి, జిల్లా అధ్యక్ష పదవికి రాజీనామా చేసి ఈనెల14న కాంగ్రెస్లో చేరేందుకు ముహూర్తం పెట్టుకున్నారు. ఇప్పటికే సీఎం రేవంత్ రెడ్డి సహా రాష్ట్ర మంత్రులను ఆయన కలిశారు. సిర్పూర్లో తన ఓటమికి కారణమైన బీఎస్పీ రాష్ట్ర అధ్యక్షుడు ఆర్ఎస్ ప్రవీణ్ కుమార్తో పొత్తు పెట్టుకున్న హైకమాండ్ తీరుపై ఆయన అసంతృప్తితో ఉన్నారు. ఆర్ఎస్ ప్రవీణ్ కుమార్ సిర్పూర్ నుంచి పోటీ చేయకపోతే తానే గెలిచేవాడినని, తన ఓటమికి కారణమైన వ్యక్తితో కలిసి పని చేయడం ఇష్టం లేకనే ఈ నిర్ణయానికి వచ్చినట్టు తెలుస్తోంది.
ఇటీవలే కొనప్ప సోదరుడు, ఆసిఫాబాద్ జడ్పీ చైర్మన్ కోనేరు కృష్ణారావుతో పాటు సీఎం రేవంత్ రెడ్డిని కలిసి చేరిక విషయమై చర్చించారు. ఈనెల 14 వ తేదీన కోనప్ప తన అనుచగణంతో, జడ్పీ చైర్మన్, కాగజ్ నగర్ మున్సిపల్ చైర్మన్, ఎంపీపీలు, జడ్పీటీసీలతో కలిసి మంత్రులు సీతక్క, పొంగులేటి శ్రీనివాసరెడ్డి, తుమ్మల నాగేశ్వరరావు, కోమటిరెడ్డి వెంకటరెడ్డి, శ్రీధర్ బాబుతో పాటు ఉమ్మడి అదిలాబాద్ జిల్లాలోని పార్టీ ఎమ్మెల్యేల సమక్షంలో కాంగ్రెస్లో చేరనున్నారు. కోనప్ప నిర్ణయంతో సిర్పూర్లో ఒకప్పుడు బలంగా ఉన్న బీఆర్ఎస్ ఇప్పుడు ఖాళీ కానుంది.
