- మొదటిస్థానంలో బెంగళూరు ఎంజీ రోడ్
హైదరాబాద్, వెలుగు: మనదేశంలోనే అత్యంత ఖరీదైన వీధుల్లో (హై స్ట్రీట్స్) హైదరాబాద్లోని సోమాజిగూడ రెండో స్థానంలో నిలిచింది. మొదటి స్థానంలో బెంగళూరులోని ఎంజీ రోడ్ ఉంది. సోమాజీగూడలో ఒక చదరపు అడుగుకు నెలకు రూ.150–175 వరకు అద్దె వసూలు చేస్తున్నారు. ముంబై లింకింగ్ రోడ్, ఢిల్లీ సౌత్ ఎక్స్టెన్షన్ పార్ట్ I & పార్ట్ II, కోల్కతాలోని పార్క్ స్ట్రీట్, కామాక్ స్ట్రీట్, చెన్నై అన్నా నగర్, బెంగళూరు కమర్షియల్ స్ట్రీట్, నోయిడా సెక్టార్ 18 మార్కెట్, బెంగళూరు బ్రిగేడ్ రోడ్, బెంగళూరు చర్చి స్ట్రీట్ మిగతా స్థానాల్లో ఉన్నాయి. మొత్తం పది మార్కెట్ లొకేషన్లలో నాలుగు బెంగళూరులోనే ఉండటం గమనించదగ్గ విషయం.
గ్లోబల్ రియల్ ఎస్టేట్ కన్సల్టెన్సీ నైట్ ఫ్రాంక్ ఇండియాలోని మొత్తం 30 మార్కెట్లలో సర్వే నిర్వహించి ఈ రిపోర్ట్ విడుదల చేసింది. దీని ప్రకారం..యాక్సెస్, పార్కింగ్, షాపులు వంటి పారామీటర్ల ఆధారంగా ఈ వీధులకు ర్యాంకులు ఇచ్చారు. సర్వే జరిపిన 30 హై స్ట్రీట్లలో అత్యధికంగా దుస్తుల స్టోర్లు ఎక్కువగా ఉన్నాయి. ఈ పది వీధుల్లో ప్రస్తుత ఆర్థిక సంవత్సరంలో రెండు బిలియన్ డాలర్ల విలువైన లావాదేవీలు జరిగేందుకు అవకాశాలు ఉన్నాయని నైట్ఫ్రాంక్ సీనియర్ ఎగ్జిక్యూటివ్ ఒకరు చెప్పారు. మనదేశంలో జరుగుతున్న రిటైల్ లావాదేవీల్లో 24 శాతం వాటా ఎన్సీఆర్ మార్కెట్నుంచే ఉంది. ఢిల్లీ ఖాన్మార్కెట్, డీఎల్ఎఫ్ గలేరియా, ముంబై లింకింగ్ రోడ్, టర్నర్ రోడ్లో అత్యధికంగా అద్దెలు వసూలు చేస్తున్నారు.