నారాయణపేట,వెలుగు: అధికారులు నిర్లక్ష్యం వీడి, ప్రజాప్రతినిధులతో కలిసి జిల్లా అభివృద్ధికి తోడ్పడాలని రాష్ట్ర ఎక్సైజ్శాఖ మంత్రి శ్రీనివాస్గౌడ్ ఆదేశించారు. శనివారం నారాయణపేట జడ్పీ చైర్పర్సన్ వనజమ్మ అధ్యక్షతన జడ్పీ సర్వసభ్య సమావేశం జరిగింది. హాజరైన మంత్రి మాట్లాడుతూ సమావేశాల్లో సమస్యలపై ప్రజాప్రతినిధులు అధికారులను ప్రశ్నించడం, నిలదీయడమే కాకుండా సంక్షేమ పథకాలు క్షేత్ర స్థాయిలో అందరికీ అందే విధంగా సమన్వయంతో పనిచేయాలని, ఏ సమస్యలు లేని మండలాలుగా తీర్చిదిద్దుకోవాలని సూచించారు. త్వరలో సీఎం కేసీఆర్ కలెక్టరేట్, ఎస్పీ, మెడికల్ కాలేజీ బిల్డింగ్ ప్రారంభించేందుకు రానుండడంతో జడ్పీ ఆఫీస్ బిల్డింగ్ నిర్మాణానికి శంకుస్థాపన చేసుకునేందుకు స్థలాన్ని గుర్తించాలని అధికారులను ఆదేశించారు. జిల్లాలోని ప్రతి ఎకరానికి సాగునీరందించేందుకు త్వరలో ఒక మెగా ప్లాన్ తయారు రూపొందించాలని మంత్రి అధికారులను ఆదేశించారు. వడ్ల కొనుగోళ్లలో రైతులకు ఎలాంటి ఇబ్బందులు కలగకుండా చూడాలని అగ్రికల్చర్ ఆఫీసర్ను ఆదేశించారు. కేంద్రం ఏపీతో పాటు ఇతర రాష్ట్రాలలో వ్యవసాయ మోటార్లకు మీటర్లు పెట్టడం ప్రారంభించిందని కేసీఆర్ ఉన్నంత వరకు తెలంగాణలో ఉచిత విద్యుత్ ఇస్తామని మంత్రి చెప్పారు.
అధికారులు తప్పుడు సమాచారం ఇవ్వొద్దు
వ్యవసాయశాఖ అంశంపై జరిగిన చర్చలో ఎమ్మెల్యే ఎస్.రాజేందర్రెడ్డి మాట్లాడుతూ ఎజెండాలో తప్పుడు సమాచారం ఇచ్చి ఆఫీసర్లు తప్పుదోవ పట్టించొద్దన్నారు. కేంద్ర ప్రభుత్వం కిసాన్సమ్మాన్కింద 2019 నుంచి రూ.205 కోట్లు ఇస్తే రాష్ట్రం ఇప్పటి వరకు జిల్లాలోనే రూ.2,000 కోట్లు ఇచ్చిందన్నారు. పూర్తి సమాచారం ఇస్తే బీజేపీ అసమర్ధత సభ్యులకు తెలుస్తుందన్నారు. నకిలీ సీడ్స్, పురుగుల మందులతో రైతులు నష్టపోతున్నా.. అధికారులు పట్టించుకుంటలేరని ఊట్కూర్ జడ్పీటీసీ అశోక్ సభ దృష్టికి తీసుకురాగా.. చర్యలు తీసుకుంటున్నామని అగ్రికల్చర్ఆఫీసర్ జాన్ సుధాకర్ తెలిపారు. సబ్సిడీపై సీడ్స్, యంత్రాలు ఏమయ్యాయని, రైతు రుణమాఫి చేస్తలేరని మద్దూర్ జడ్పీటీసీ ప్రశ్నించగా అధికారులు సమాధానం ఇవ్వలేదు. ఏఈవోలు క్షేత్రస్థాయిలో పనిచేస్తలేరని కోస్గి జడ్పీటీసీ ప్రకాశ్రెడ్డి ఆరోపించారు.
విద్యుత్శాఖ అధికారులపై ఎమ్మెల్యే సీరియస్
కొల్లంపల్లి, వెంకటాపూర్, గున్ముక్ల సబ్స్టేషన్లు పూర్తయినా 5 ఏళ్ల నుంచి ఎందుకు ప్రారంభిస్తలేరని ఏడీపై ఎమ్మెల్యే రాజేందర్రెడ్డి సీరియస్అయ్యారు. ఇవి ప్రారంభం కాకపోతే జిల్లాలో ఎస్ఈ ఆఫీస్ ఎలా ప్రారంభిస్తారో? ఎస్ఈ ఇక్కడ ఎలా కూర్చుంటాడో చూస్తానన్నారు. జిల్లాలో ఫుల్టైం డీఈవో లేనందున ఇక్కడ విద్యాశాఖ పరిస్థితి అధ్వానంగా తయారైందని ఎమ్మెల్యే రాజేందర్రెడ్డి అన్నారు. ఎజెండాలో స్కూళ్ల సంఖ్య వివరాలు కూడా తప్పుగా ఇస్తున్నారని వాపోయారు. మాగనూరు పీహెచ్సీలో డాక్టర్లు లేరని ఎంపీపీ, జడ్పీటీసీ సభకు వివరించారు. 30 మంది డాక్టర్లు త్వరలో జాయిన్అవుతారని ఎమ్మెల్యేఈ సందర్భంగా చెప్పారు. మిషన్భగీరథ పనులు కూడా వేగంగా పూర్తి చేయాలని దామరగిద్ద మండలంలో పైప్లైన్ ఎందుకు పెండింగ్ ఉందని, మరికల్మండలంలో నీళ్లు ఎందుకు సరఫరా చేస్తలేరని ఎమ్మెల్యే అధికారులను ప్రశ్నించారు. మక్తల్నుంచి నారాయణపేట రోడ్డు అధ్వానంగా తయారైందని సీరియస్అయ్యారు. దామరగిద్ద రోడ్డు పూర్తి చేయలేదని ఎంపీపీ నర్సప్ప అధికారులను ప్రశ్నించారు. దీనిపై ఆఫీసర్కు ఎంపీపీకి కొద్ది సేపు వాగ్వాదం జరగగా కలెక్టర్ శ్రీహర్ష కలుగజేసుకుని సమస్యను పరిష్కరిస్తానని
హామీ ఇచ్చారు.
ప్రొటోకాల్ పాటిస్తలేరు..
ఆఫీసర్లు ప్రొటోకాల్ పాటిస్తలేరని, ప్రజా ప్రతినిధులకు సమాచారం ఇవ్వకుండా ప్రభుత్వ కార్యక్రమాలు చేస్తున్నారని మద్దూర్ జడ్పీటీసీ కలెక్టర్ దృష్టికి తెచ్చారు. ప్రతి జడ్పీ మీటింగ్లో మినిట్స్ ఎందుకు ఇవ్వటం లేదని ఎమ్మెల్యే ఎస్ఆర్ రెడ్డి జడ్పీ సీఈవోను ప్రశ్నించారు. ఎంపీ మన్నె శ్రీనివాస్రెడ్డి, కలెక్టర్ కోయ శ్రీహర్ష, ఎమ్మెల్యే చిట్టెం రాంమ్మోహన్రెడ్డి, అడిషనల్ కలెక్టర్ మియాంక్ మిట్టల్ తదితరులు పాల్గొన్నారు.
