హైదరాబాద్, వెలుగు : సమ్మక్క సాగర్ రిజర్వాయర్లో నీటి నిల్వను 80 మీటర్ల వరకే పరిమితం చేయాలని రాష్ట్ర ప్రభుత్వం నిర్ణయం తీసుకుంది. రిజర్వాయర్లో పూర్తిస్థాయి నీళ్లు నిల్వ చేస్తే తమ రాష్ట్రంలో ముంపు తలెత్తుతుందని ఛత్తీస్గఢ్కొంతకాలంగా అభ్యంతరం వ్యక్తం చేస్తున్నది. తమ అభ్యంతరాలను పరిగణనలోకి తీసుకోకుండా ఆ ప్రాజెక్టుకు తుది అనుమతులు ఇవ్వొద్దని కొర్రీలు పెడుతోంది. ములుగు జిల్లా తుపాకులగూడెం వద్ద గోదావరి నదిపై 1.13 కి.మీ.ల పొడవు, 83 మీటర్ల ఎత్తులో సమ్మక్క సాగర్బ్యారేజీ నిర్మించారు. 8.50 లక్షల క్యూసెక్కుల వరద కిందికి వదిలేట్టుగా 48 రేడియల్గేట్లు బిగించారు. రిజర్వాయర్లో 83 మీటర్ల ఎత్తులో 6.94 టీఎంసీలు, 71 మీటర్ల ఎత్తులో 2.90 టీఎంసీలు నిల్వ ఉంటాయి. 83 మీటర్ల ఎత్తులో నీటిని నిల్వ చేస్తే తమ రాష్ట్రంలో ముంపు ఎక్కువగా ఉంటుందని, దానిపై శాస్త్రీయ అధ్యయనం చేయాలని, మునిగిపోయే భూములకు పరిహారం, ఆర్అండ్ఆర్ప్యాకేజీ ఇవ్వాలని ఛత్తీస్గఢ్ప్రభుత్వం సీడబ్ల్యూసీకి ఫిర్యాదు చేసింది. ఆ కంప్లయింట్పై చర్యలు తీసుకోవాలని సీడబ్ల్యూసీ రాష్ట్రానికి పలుమార్లు లేఖలు రాసింది. పొరుగు రాష్ట్రం కొర్రీల నేపథ్యంలో రిజర్వాయర్లో నీటి నిల్వను తగ్గించుకోవాలని సర్కారు నిర్ణయించింది. రివర్బెడ్లోనే నీటిని నిల్వ చేసేలా నిర్ణయం తీసుకుంది. 83 మీటర్ల ఎత్తులో బ్యారేజీ నిర్మించినా, 80 మీటర్ల వరకే నీళ్లు నిల్వ చేస్తామని, ఛత్తీస్గఢ్లో ముంపు లేకుండా చర్యలు తీసుకుంటామని సీడబ్ల్యూసీకి లేఖ రాయడానికి సిద్ధమైంది. ఈ బ్యారేజీలో నిల్వ చేసే నీటిని దేవాదుల లిఫ్ట్స్కీం ద్వారా ఎత్తిపోస్తారు. ఏడాది పొడవునా 80 మీటర్ల ఎత్తులో నీటిని నిల్వ చేస్తామని ఇంజినీర్లు చెప్తున్నారు. నీటిని నిల్వ చేసే ఎత్తు తగ్గించడంతో రిజర్వాయర్లో 4.50 టీఎంసీలు మాత్రమే నిల్వ చేయగలమని పేర్కొంటున్నారు.
