భారతీయ సినీ సంగీత ప్రపంచంలో ఒక అద్భుతమైన స్వర తరంగం నిశ్శబ్దమైంది. తన మధురమైన సంగీతంతో దక్షిణాది ప్రేక్షకులను , ముఖ్యంగా మలయాళ చిత్ర పరిశ్రమను ఉర్రూతలూగించిన దిగ్గజ సంగీత దర్శకుడు ఎస్పీ వెంకటేశ్ ( 70 ) కన్నుమూశారు. కొంతకాలంగా అనారోగ్యంతో పోరాడుతున్న ఆయన, పరిస్థితి విషమించడంతో మంగళవారం తుదిశ్వాస విడిచారు. ఆయన మరణంతో సంగీత సామ్రాజ్యంలో ఒక సువర్ణ అధ్యాయం ముగిసినట్లయింది.
గిటారిస్ట్గా మొదలై..
1971లో ఒక సాధారణ గిటారిస్ట్గా తన కెరీర్ను ప్రారంభించిన ఎస్పీ వెంకటేశ్.., సంగీత దర్శకుడు శ్యామ్ వద్ద సహాయకుడిగా చేరారు. సంగీతంపై ఆయనకున్న మక్కువ, పట్టుదలే ఆయనను అనతికాలంలోనే స్వతంత్ర సంగీత దర్శకుడిగా మార్చాయి.ఎస్పీ వెంకటేశ్ పేరు వినగానే మలయాళ ప్రేక్షకులకు గుర్తుకువచ్చేది ఆయన అందించిన మెలోడీలు. దర్శకుడు ప్రియదర్శన్, హీరో మోహన్ లాల్లతో ఆయన చేసిన సినిమాలు బాక్సాఫీస్ వద్ద సంగీతపరంగా విప్లవాన్ని సృష్టించాయి.
బహుభాషా ప్రజ్ఞాశాలి
‘కిలిక్కం’ (Kilukkam), ‘ధృవం’ (Dhruvam), ‘మణిచిత్రతాళు’, ‘కౌరవర్’ వంటి చిత్రాలు ఆయన ప్రతిభకు నిలువుటద్దాలు. ముఖ్యంగా 'కిలిక్కం' చిత్రంలోని పాటలు ఇప్పటికీ కేరళలోని ప్రతి ఇంట్లో వినిపిస్తూనే ఉంటాయి. పాటలకే కాకుండా, సన్నివేశాల్లోని భావోద్వేగాలను పండించడంలో ఆయన అందించే నేపథ్య సంగీతం అద్భుతంగా ఉండేది. అందుకే ఆయనను 'బిజిఎం మాస్టర్' అని కూడా పిలిచేవారు. కేవలం మలయాళానికే పరిమితం కాకుండా తెలుగు, తమిళం, హిందీ, బెంగాలీ భాషల్లో కలిపి 250కి పైగా చిత్రాలకు ఆయన పనిచేశారు. సంగీతంలో ఆయన చేసిన కృషికి గాను ఉత్తమ సంగీత దర్శకుడిగా ఫిల్మ్ఫేర్ అవార్డు, కేరళ స్టేట్ ఫిల్మ్ అవార్డులతో పాటు ఎన్నో గౌరవ పురస్కారాలు లభించాయి.
సినీ ప్రముఖుల నివాళులు
ఎస్పీ వెంకటేశ్ మరణం పట్ల మలయాళ స్టార్ హీరోలు మోహన్ లాల్, మమ్ముట్టి తీవ్ర దిగ్భ్రాంతి వ్యక్తం చేశారు. ఆయన అందించిన రాగాలు మా సినిమాలకు ప్రాణం పోశాయి. సంగీత ప్రపంచం ఒక గొప్ప మేధావిని కోల్పోయింది అంటూ సోషల్ మీడియా వేదికగా ఎమోషనల్ అయ్యారు. ఏఆర్ రెహమాన్ వంటి ప్రముఖ సంగీత దర్శకులు కూడా ఆయనతో తమకున్న అనుబంధాన్ని గుర్తు చేసుకున్నారు. రేపు చెన్నైలో ఆయన అంత్యక్రియలు జరగనున్నాయి. ఆయన భౌతికంగా మన మధ్య లేకపోయినా, ఆయన సృష్టించిన మధురమైన స్వరాలు ఎప్పటికీ సంగీతాభిమానుల గుండెల్లో ప్రతిధ్వనిస్తూనే ఉంటాయి.
