చెన్నైకి గుడ్‌బై.. ఇంగ్లాండ్ టెస్ట్ కోచ్‌గా స్టీఫెన్ ఫ్లెమింగ్?

Stephen Fleming: చెన్నై సూపర్ కింగ్స్ (CSK) తో పాటు దానికి అను అనుబంధ ఫ్రాంచైజీలైన టెక్సాస్ సూపర్ కింగ్స్, జోహ్యాన్నెస్‌బర్గ్ సూపర్ కింగ్స్ హెడ్ కోచ్ బాధ్యతల నుంచి తప్పించిన కొద్ది రోజులకే న్యూజిలాండ్ దిగ్గజం స్టీఫెన్ ఫ్లెమింగ్ కి సరికొత్త ఆఫర్ వచ్చింది. ఇంగ్లాండ్ పురుషుల టెస్ట్ జట్టు హెడ్ కోచ్‌గా ఆయన నియామకం దాదాపు ఫిక్స్ అయింది. ప్రస్తుత కోచ్ బ్రెండన్ మెకల్లమ్ స్థానంలో ఫ్లెమింగ్ ఈ బాధ్యతలు స్వీకరించనున్నారు. ఆండీ ఫ్లవర్ ఈ రేసు నుంచి తప్పుకోవడంతో రిచర్డ్ డాసన్, జోనాథన్ ట్రాట్, టామ్ మూడీలను ఇంటర్వ్యూ చేసిన ఇంగ్లాండ్ అండ్ వేల్స్ క్రికెట్ బోర్డు (ECB), చివరకు ఫ్లెమింగ్ వైపే ఇంట్రెస్ట్ చూపించినట్లు తెలుస్తుంది. 

పాకిస్తాన్ సిరీస్‌తోనా? లేక సౌతాఫ్రికా టూర్ నుంచేనా: 
ఆగస్టు 19వ తేదీ నుంచి పాకిస్తాన్‌తో ప్రారంభమయ్యే 3 టెస్టుల సిరీస్‌కు స్టీపెన్ ఫ్లెమింగ్ ఎప్పటి నుంచి బాధ్యతలు స్వీకరిస్తారనే దానిపై ఇంకా క్లారిటీ రాలేదు. ఒకవేళ అసిస్టెంట్ కోచ్ మార్కస్ ట్రెస్కోథిక్ పాకిస్తాన్ సిరీస్‌కు తాత్కాలిక కోచ్‌గా వ్యవహరిస్తే, డిసెంబర్ 17వ తేదీ నుంచి దక్షిణాఫ్రికాతో జరిగే సిరీస్ నుంచి ఫ్లెమింగ్ పూర్తిస్థాయి బాధ్యతలు చేపట్టే ఛాన్స్ ఉంది. కాగా, బెన్ స్టోక్స్ రిటైర్మెంట్ తర్వాత ఇంగ్లాండ్ టెస్ట్ జట్టుకు కొత్త కెప్టెన్‌ను ఎంపిక చేయాల్సి ఉంది. వైస్ కెప్టెన్ హ్యారీ బ్రూక్ రేసులో ఉన్నప్పటికీ, మాజీ కెప్టెన్ జో రూట్‌కు మళ్లీ సారథ్య బాధ్యతలు అప్పగించడానికి ఈసీబీ చూస్తుంది. 

టెస్టులకు ఫ్లెమింగ్.. వైట్ బాల్‌కు మెకల్లమ్: 
ఈ నియామకం కేవలం టెస్ట్ క్రికెట్‌కు (రెడ్ బాల్) మాత్రమే పరిమితం కానుంది. పరిమిత ఓవర్ల ఫార్మాట్లలో (వన్డే, టీ20) బ్రెండన్ మెకల్లమ్ హెడ్ కోచ్‌గా కొనసాగుతారు. 2022లో కేవలం టెస్ట్ కోచ్‌గా ప్రయాణం స్టార్ట్ చేసిన మెకల్లమ్, 2025లో అన్ని ఫార్మాట్ల బాధ్యతలు చేపట్టగా, ఇప్పుడు మళ్లీ రెడ్ బాల్, వైట్ బాల్ కోచింగ్‌ను ఈసీబీ వేరు చేసింది. విశేషమేమిటంటే, అంతర్జాతీయ క్రికెట్‌లో స్టీఫెన్ ఫ్లెమింగ్ కెప్టెన్సీలోనే బ్రెండన్ మెకల్లమ్ న్యూజిలాండ్ తరఫున అరంగేట్రం చేశాడు.

డబ్ల్యూటీసీలో వెనుకబడిన ఇంగ్లాండ్: 
ప్రస్తుతం ఇంగ్లాండ్ టెస్ట్ జట్టు తీవ్ర నిరాశాజనక ప్రదర్శనతో ఊగిసలాడుతోంది. మొదటి 3 ప్రపంచ టెస్ట్ ఛాంపియన్‌షిప్ (WTC) ఫైనల్స్‌కు అర్హత సాధించలేకపోయిన ఇంగ్లాండ్, ప్రస్తుత 2025–27 డబ్ల్యూటీసీ పాయింట్ల పట్టికలో 7వ స్థానంలో కొనసాగుతుంది. ఇటీవల ఆస్ట్రేలియా చేతిలో యాషెస్‌లో 4–1తో, స్వదేశంలో న్యూజిలాండ్ చేతిలో  2–1తో సిరీస్ ఓడిపోయిన ఇంగ్లాండ్‌ను మళ్లీ విజేతగా నిలబెట్టడం ఫ్లెమింగ్ ముందున్న అతిపెద్ద సవాలు.

ఐపీఎల్ లెజెండరీ కోచింగ్ రికార్డ్: 
2009 నుంచి 2026 సీజన్ వరకు చెన్నై సూపర్ కింగ్స్ హెడ్ కోచ్‌గా వ్యవహరించిన ఫ్లెమింగ్, ఐపీఎల్ చరిత్రలోనే అత్యంత విజయవంతమైన కోచ్‌గా నిలిచారు. అతడి మార్గదర్శకత్వంలో సీఎస్కే 5 ఐపీఎల్ టైటిళ్లు, 2 ఛాంపియన్స్ లీగ్ టీ20 టైటిళ్లను గెలుచుకుంది. ప్లేయర్‌గా 111 టెస్టులాడి 7,172 రన్స్ చేసిన స్టీపెన్ చేసిన ఫ్లెమింగ్, న్యూజిలాండ్ జట్టుకు అత్యధికంగా 80 టెస్టుల్లో కెప్టెన్‌గా వ్యవహరించిన అనుభవం ఉంది.