- ఒంటిపై పెట్రోల్ పోసుకుని నిప్పు
- ప్రేమ వ్యవహారమే కారణమని సూసైడ్ నోట్
ఉప్పల్, వెలుగు: ఉస్మానియా యూనివర్సిటీలో ఓ ఇంజినీరింగ్ స్టూడెంట్ ఆత్మహత్యాయత్నానికి పాల్పడటం తీవ్ర కలకలం రేపింది. మహబూబ్నగర్ జిల్లా గోవిందపురానికి చెందిన వినీష్ (19) ఓయూలో మైనింగ్ ఫస్టియర్ చదువుతున్నాడు. సోమవారం ఉదయం లేడీస్ హాస్టల్ సమీపంలో ఒంటిపై పెట్రోల్ పోసుకుని నిప్పంటించుకున్నాడు.
స్థానికుల సమాచారంతో పోలీసులు ఘటనాస్థలాన్ని పరిశీలించారు. తీవ్రంగా గాయపడిన అతడిని ట్రీట్మెంట్ కోసం సికింద్రాబాద్లోని గాంధీ దవాఖానకు తరలించారు. ఘటనా స్థలంలో అతడు రాసిన సూసైడ్ నోట్ను పోలీసులు గుర్తించారు. తాను ప్రేమించిన అమ్మాయి మోసం చేసిందని, తట్టుకోలేక ఆత్మహత్య చేసుకుంటున్నట్లు అందులో పేర్కొన్నాడు. గతంలోనూ వినీష్ పలుమార్లు ఆత్మహత్యాయత్నం చేసినట్లు సమాచారం. ఈ ఘటనపై పోలీసులు కేసు నమోదు చేసి దర్యాప్తు చేస్తుండగా, 70 శాతం కాలిన గాయాలతో వినీష్ చికిత్స పొందుతున్నాడు.
