నెల్లూరు జిల్లాలో ప్రేమ పేరుతో విద్యార్థిని బలైంది. తన ప్రేమను నిరాకరించిందని ఇంట్లోనే ఆమెను చంపిన యువకుడు తర్వాత ఆత్మహత్యాయత్నం చేశాడు. ఈ సంఘటన గూడూరులో గురువారం జరిగింది.
గూడూరుకు చెందిన పి.సుధాకర్‌, సరిత దంపతులు ఉపాధ్యాయులుగా పనిచేస్తున్నారు. వీరికి కుమార్తె తేజశ్వని, కుమారుడు కార్తీక్ ఉన్నారు. తేజశ్వని ఇంజినీరింగ్‌ చివరి సంవత్సరం చదువుతోంది. సుధాకర్‌ సహోద్యోగి చెంచుకృష్ణయ్య కుమారుడు వెంకటేష్‌కు, తేజశ్వనికి కొంతకాలం క్రితం పరిచయం ఏర్పడింది. తనను ప్రేమించాలంటూ వెంకటేష్ ఆమెను తరుచూ వేధించేవాడు. అతడి ప్రవర్తనతో విసిగిపోయిన తేజశ్వని ఈ విషయాన్ని పెద్దలకు చెప్పింది. దీంతో వెంకటేష్‌ను తండ్రి చెంచుకృష్ణయ్య బెంగళూరుకు పంపారు.
కరోనా బారిన పడిన వెంకటేష్.. ఈ ఏడాది మొదట్లో వెంకటేష్ గూడూరు వచ్చి ఇక్కడే ఉంటున్నాడు. ప్రేమ పేరుతో ఆమెను మళ్లీ వేధించడం మొదలుపెట్టాడు. ఈ వేధింపులకు తట్టుకోలేక ఆమె తన ఫోన్‌ నంబరు మార్చేసింది. దీంతో తనను పట్టించుకోని తేజశ్వనిపై కక్ష పెంచుకున్నాడు. గురువారం(జులై 1) సుధాకర్‌, సరిత… పాఠశాలకు వెళ్లగా తేజశ్వని, ఆమె తమ్ముడు కార్తిక్‌ ఇంట్లోనే ఉన్నారు. ఉదయం 11 గంటల సమయంలో వెంకటేష్, తన స్నేహితుడిని వెంటబెట్టుకుని తేజశ్వని ఉండే అపార్ట్‌మెంట్‌ దగ్గరకు వచ్చాడు. తాను కిందే ఉండి స్నేహితుడిని పైకి పంపించాడు. అతను వారి ఫ్లాట్‌కు వెళ్లి తేజశ్వనిని ఫోన్‌ నంబరు అడిగాడు. దీంతో కార్తిక్‌ అలర్టై ఈ విషయాన్ని తండ్రికి చెప్పేందుకు తన ఫోన్‌ తీసుకుని కిందికి వచ్చాడు. కార్తిక్‌ కిందికి రావడాన్ని గమనించిన వెంకటేష్ వెంటనే పైకి వెళ్లి తన స్నేహితుడిని అక్కడి నుంచి పంపేశాడు. తేజశ్వని ఉన్న గదిలోకి వెళ్లి తలుపు మూసి చాకుతో ఆమె గొంతులో పొడిచాడు. తర్వాత చున్నీని ఆమె మెడకు బిగించి చంపాడు.
కార్తిక్‌ ద్వారా విషయం తెలుసుకున్న సుధాకర్‌.. పోలీసులకు ఫోన్‌ చేశారు. దీంతో పోలీసులు వెంటనే సంఘటన స్థలానికి చేరుకున్నారు. మూసి ఉన్న గది తలుపులను బలవంతంగా తెరిచి లోపలికి వెళ్లగా… అపస్మారక స్థితిలో పడి ఉన్న తేజశ్వని… చీరతో కిటికీకి ఉరేసుకున్న వెంకటేష్ కనిపించారు. పోలీసులు ఇద్దరినీ ఆసుపత్రికి తరలించారు. తేజశ్వని అప్పటికే మృతి చెందినట్లు డాక్టర్లు నిర్ధారించారు. వెంకటేష్ పరిస్థితి విషమంగా ఉండటంతో మెరుగైన వైద్యంకోసం నెల్లూరు తరలించారు. తేజశ్వని తండ్రి సుధాకర్‌ ఇచ్చిన ఫిర్యాదుతో వెంకటేష్, అతడి తండ్రి చెంచుకృష్ణయ్య, వెంకటేష్ స్నేహితుడిపై పోలీసులు కేసు నమోదు చేసి దర్యాప్తు చేపట్టారు.
