నిజాంపేట, వెలుగు : గ్రామీణ ప్రాంతాల విద్యార్థులకు బస్సు సౌకర్యం కల్పించాలని డిమాండ్ చేస్తూ మెదక్-–సిద్దిపేట నేషనల్ హైవేపై నిజాంపేట మండలం చల్మేడ కమాన్ వద్ద గురువారం ఏబీవీపీ ఆధ్వర్యంలో రాస్తారోకో చేశారు. ఈ సందర్భంగా స్టూడెంట్స్ మాట్లాడుతూ నస్కల్, నందగోకుల్, రాంపూర్, చల్మెడ, కల్వకుంట గ్రామాలకు బస్సు సౌకర్యం లేక రోజూ నడుచుకుంటూ కాలేజీలు, స్కూళ్లకు వెళ్తున్నామని చెప్పారు.
ఆలస్యం కారణంగా రోజూ క్లాస్లు మిస్ అవుతున్నామని తెలిపారు. ఆందోళన విషయం తెలుసుకున్న నిజాంపేట పోలీసులు ఘటనా స్థలానికి చేరుకొని మెదక్ ఆర్టీసీ డీఎంతో ఫోన్ లో మాట్లాడి స్టూడెంట్స్కు నచ్చజెప్పడంతో రాస్తారోకో విరమించారు.
