బెంగళూరు : దైవ దర్శనానికి వెళ్లొచ్చిన భక్తులు మరుసటి రోజు అస్వస్థతకు గురయ్యారు. వాంతులు, విరేచనాలతో ఆస్పత్రి పాలయ్యారు. ఒకరిద్దరు కాదు.. ఏకంగా 70 మంది ఆస్పత్రిలో చేరారు. శనివారం బెంగళూరులోని హోస్కొటెలోని ఓ ఆలయానికి వెళ్లిన భక్తులకు ఈ పరిస్థితి ఎదురైంది. ఇవే లక్షణాలతో చికిత్స పొందుతూ ఆదివారం ఆస్పత్రిలో చేరిన ఓ మహిళ సోమవారం చనిపోయింది. హోస్కొటె చుట్టుపక్కల ప్రాంతాల్లోని ఐదు ఆసుపత్రులలో బాధితులు అడ్మిట్ అయ్యారని వైద్యారోగ్య శాఖ అధికారులు తెలిపారు. బాధితుల సంఖ్య ఎక్కువగా ఉండడంతో వీరికోసం ప్రత్యేకంగా ఓ ఫ్లోర్ మొత్తాన్ని కేటాయించినట్లు ఓ ఆస్పత్రి వర్గాలు తెలిపాయి. కాగా, ఆలయంలో తిన్న ప్రసాదం ఫుడ్ పాయిజన్ అయ్యుండొచ్చని బాధితులు చెబుతున్నారు. అయితే, ఆ ప్రసాదం తినని వారు కూడా ఇవే లక్షణాలతో ఆస్పత్రిలో చేరారని పోలీస్ ఉన్నతాధికారి ఒకరు వెల్లడించారు. దీంతో బాధితుల పరిస్థితికి ప్రసాదం కారణం కాకపోవచ్చని అభిప్రాయపడ్డారు. విచారణ తర్వాతే ఈ ఘటనకు కారణమేంటనే విషయం తెలుస్తుందని వివరించారు. ఈ ఘటనకు సంబంధించి ఇప్పటి వరకు ఎలాంటి ఫిర్యాదు అందలేదన్నారు. ఆస్పత్రిలో బాధితుల నుంచి వాంగ్మూలం సేకరించి ప్రాథమిక విచారణ చేపట్టినట్లు పోలీసులు వివరించారు. వైద్యారోగ్య శాఖ అధికారులు, ఫుడ్ సేఫ్టీ ఆఫీసర్ నుంచి కంప్లైంట్కోసం ఎదురుచూస్తున్నట్లు తెలిపారు. బాధితుల స్టేట్మెంట్లు, అధికారుల ఫిర్యాదుల ఆధారంగా దర్యాఫ్తు జరిపి తగిన చర్యలు తీసుకుంటామని పోలీస్ ఉన్నతాధికారులు తెలిపారు.
